Երեւանի ավագանու արտահերթ ընտրությունների քարոզարշավը պաշտոնապես մեկնարկեց: Ավագանու այս ընտրություններին 12 քաղաքական ուժ է մասնակցում՝ 8 կուսակցություն եւ 4 դաշինք: Նախկին իշխող ՀՀԿ-ն նոր ընտրություններին չի մասնակցում:
Քաղաքական ուժերի մի մասը քարոզարշավի մեկնարկը տվել է մամուլի ասուլիսով, մի քանիսն էլ լրագրողներին հանդիպել է երեկ եւ այսօր արդեն անցել ընտրողների հետ հանդիպմանը: «Իմ քայլը» դաշինքի թեկնածուներն այսօր Էրեբունի վարչական շրջանում էին. նախ բակային հանդիպումներ ընտրողների հետ, իսկ երեկոյան՝ հանրահավաք, որին մասնակցել է նաեւ վարչապետ Նիկոլ Փաշինյանը:
Դաշնակցությունը քարոզարշավի մեկնարկը տվել է Արամ Մանուկյանի արձանի հարակից տարածքում հավաքով, որին հետեւել է ավտոերթ մայրաքաղաքի փողոցներով: Հավաքով է մեկնարկել նաեւ «Ժառանգության» քարոզարշավը: Ի դեպ՝ երեկ արդեն առաջին միջադեպն է տեղի ունեցել. կեսգիշերին մոտ «Ժառանգության» անդամն ու համակիրներից մեկն Ազգային ժողովի մոտից բերման են ենթարկվել՝ կուսակցության քաղաքական գովազդն անելու համար, որոշ ժամանակ անց նրանց ազատ են արձակել:
Տրանսպորտ, աղբահանություն, կանաչապատում, քաղաքաշինական խնդիրներ. քաղաքական ուժերի ծրագրերում մայրաքաղաքի՝ բոլորին խնդիրներն են ու դրանց լուծման յուրաքանչյուրի տարբերակը: Դրանք ներկայացնելու համար ընտրություններին մասնակցող ուժերը կարճ ժամանակ ունեն. ընտրություններն արտահերթ են, եւ քարոզարշավը կտեւի ընդամենը 12 օր՝ մինչեւ սեպտեմբերի 21-ը, իսկ քվեարկությունը սեպտեմբերի 23-ին է: Նշենք, որ Երեւանի ավագանին 65 անդամ կունենա: Ընտրությունների արդյունքներով մանդատների 40 տոկոսը ստացած քաղաքական ուժը, այդ թվում՝ շեմը չհաղթահարածների հաշվին, կտնօրինի տեղերի մեծամասնությունը եւ մայրաքաղաքի նոր քաղաքապետ կնշանակի: Փորձագետների կարծիքով՝ Երեւանի ավագանու արտահերթ ընտրությունները կդառնան «թավշյա հեղափոխության» առաջնորդ Նիկոլ Փաշինյանի առաջին լուրջ ներքաղաքական փորձությունը՝ հատկապես հաշվի առնելով, որ մայրաքաղաքում է բնակվում հանրապետության ընտրողների ավելի քան մեկ երրորդը:
Սեպտեմբերի 8-ին Հայաստանի վարչապետը կրկին Մոսկվայում էր: Մեկօրյա այցի ընթացքում Նիկոլ Փաշինյանը հասցրել է հանդիպել Ռուսաստանի նախագահի, հետո էլ՝ ռուսաստանաբնակ հայ գործարարների հետ: Փաշինյան-Պուտին հանդիպման ժամանակ երկկողմ հարաբերություններին վերաբերող հարցեր են քննարկվել: Ըստ պաշտոնական հաղորդագրության՝ կողմերը գոհ են փոխգործակցության մակարդակից: Վլադիմիր Պուտինն ասել է՝ հարաբերությունները բոլոր ուղղություններով առաջընթաց զարգանում են, Նիկոլ Փաշինյանն էլ ռազմատեխնիկական հարաբերություններն առավել զարգացնելու կոչ է արել:
Մինչդեռ վերջին շրջանում ակտիվորեն խոսվում է հայ-ռուսական հարաբերություններում լարվածության մասին: Կարծիք կա, որ Ռուսաստանը, մեղմ ասած, չի ողջունում Մարտի 1-ի գործով նախկին իշխանությունների ներկայացուցիչներին առաջադրվող մեղադրանքները, եւ Փաշինյան-Պուտին հանդիպման օրակարգում սա քննարկման առանցքային թեման է լինելու: Արդեն Հայաստանում լրագրողների հետ հանդիպմանը վարչապետը չի հերքել. անդրադարձ է եղել նաեւ Միքայել Հարությունյանի եւ Ռոբերտ Քոչարյանի հետ կապված հարցին:
Խոսել են նաեւ գազի սակագնից: Փաշինյանը վստահեցնում է՝ Պուտինը զարմացել է, որ Ռուսաստանից ամենաէժանը Հայաստանն է գազ ստանում, բայց սպառողներին այն թանկ է հասնում:
Գործարարների հետ հանդիպմանն էլ Նիկոլ Փաշինյանը վստահեցրել է՝ ցանկանում է, որ փոխվի հարաբերությունների այն մակարդակը եւ մտածողությունը, թե բիզնեսն ու պետությունը հակառակորդներ են: Պետք է փոխվի նաեւ բարեգործության վրա հենված հարաբերությունների մակարդակը. պետք է ներդրումներ անել, աշխատատեղ ստեղծել եւ եկամուտ ստանալ: Առավել հետաքրքիր է եղել Հայաստանի վարչապետի եւ Ռուբեն Վարդանյանի երկխոսությունը, որը լայն արձագանք է գտել մամուլում: Հայտնի գործարարը նախ կոչ է արել խոսել թվերի լեզվով, ոչ թե կոչերով եւ կարգախոսներով, քանի որ եկել են ոչ թե հանրահավաքի, այլ գործարար հանդիպման: Հետո արդեն խոսել բիզնեսի համար անհրաժեշտ պայմանների մասին: Ինչ-որ պահի երկխոսությունը բանավեճի է վերածվել:
Նախկին վարչապետ Հովիկ Աբրահամյանին նույնպես մեղադրանք առաջադրվեց: Որպես խափանման միջոց ընտրվել է չհեռանալու մասին ստորագրությունը: Նրան մեղադրանք է առաջադրվել պաշտոնեական լիազորությունների չարաշահման եւ ձեռնարկատիրական գործունեությանն ապօրինի մասնակցության համար: Այս հոդվածներով առաջադրված մեղադրանքները, ի դեպ, առնչություն չունեն Մարտի 1-ի գործի հետ:
Քննչական մարմնի որոշմանը Հովիկ Աբրահամյանն անդրադարձել է ֆեյսբուքյան գրառմամբ: Նա զավեշտալի է կոչել, իր խոսքով, «ոչ ականջահաճո հարցազրույցից հետո ՀՔԾ հրավիրվելը, ակնհայտ կեղծ մեղադրանքի առաջադրումը՝ ցանկացած այլակարծություն լռեցնելու նպատակով»: Նախկին վարչապետը նաեւ հայտարարել է, որ իշխանությունները «մարդաորս» են իրականացնում, ինչը լավ հանգրվան չի ունենալու:
Իսկ քրեական գործը հարուցվել է «Ավազահատիկ» ընկերության տնօրենի հաղորդման հիման վրա: Խոսքը հանքարդյունաբերության ոլորտում չարաշահումներին պաշտոնատար անձանց մասնակցության մասին է: Ընկերության հիմնադիրն ու այլ վկաներ իրենց ցուցմունքներում չարաշահումներին առնչություն ունեցած անձանց թվում նշել էին Հովիկ եւ Հենրիկ Աբրահամյանների, Ալիկ Սարգսյանի անունները:
Աբրահամյանին մեղադրանք առաջադրելու մասին լրագրողները հարց են ուղղել Նիկոլ Փաշինյանին: Ասել է՝ իրավապահներն առանց հիմքի մեղադրանք չէին առաջադրի: Մինչ այդ, Մխչյան գյուղում նախկին գործարանի տարածքում զենք-զինամթերք հայտնաբերելուց հետո կարծիքներ էին հնչում, որ նախկին վարչապետին նույնպես մեղադրանք է առաջադրվելու Մարտի 1-ի գործով: Զենքերն ուղարկվել են փորձաքննության, եզրակացությունը դեռ չի հրապարակվել:
Սերժ Սարգսյանի եղբորորդին՝ Հայկ Սարգսյանը 50 մլն դրամ գրավի դիմաց ազատ արձակվեց: Դատարանը բավարարեց Ալեքսանդր Սարգսյանի որդու պաշտպանի միջնորդությունը: Փաստաբանն ուրախ է, որ դատարանն «իր մեջ ուժ գտավ օբյեկտիվ որոշում կայացնելու», սակայն Երեմ Սարգսյանը կարծում է, որ գրավի բավական բարձր շեմ է սահմանվել: Ամեն դեպքում, հարազատներն արդեն վճարել են գրավի գումարը, եւ Հայկ Սարգսյանն ազատ է արձակվել: Հավելենք, որ Հայկ Սարգսյանը մեղադրվում է 11 տարի առաջ տեղի ունեցած հանցագործության՝ սպանության փորձի եւ ապօրինի կերպով զենք-զինամթերք պահելու համար: Նա առաջադրված մեղադրանքում իրեն մեղավոր չի ճանաչում: Գործով առաջին դատական նիստը սեպտեմբերի 17-ին է:
Նախօրեին Երեւանում արտակարգ դեպք է տեղի ունեցել. 49-ամյա տղամարդը կառավարության շենքի առջեւ ինքնահրկիզման փորձ է արել: Քաղաքացիներն արագ նկատել են եւ հանգցրել կրակը, սակայն տղամարդը դեմքի եւ մարմնի այրվածքներով հիվանդանոց է տեղափոխվել: Բժիշկները նրա վիճակը ծայրահեղ ծանր են գնահատում: Տղամարդը մարմնի շուրջ 57 տոկոսի եւ շնչառական ուղիների 20 տոկոսի լուրջ այրվածքներ է ստացել, խորը վերքեր ունի. նա միացված է արհեստական շնչառության սարքին: Տուժածին երեկ երեկոյան այցելել է նաեւ Նիկոլ Փաշինյանը:
Վարչապետի նոր օգնականի նշանակումը քննարկումների թեմա է դարձել: Բանն այն է, որ Նիկոլ Փաշինյանի նորանշանակ օգնական Սոֆյա Նավասարդյանը մինչ նշանակումը վարչապետի տիկնոջն ուղեկցել է պաշտոնական ուղեւորությունների ժամանակ: Մամուլում շրջանառվող լուրերի համաձայն՝ նա Աննա Հակոբյանի վարսահարդարն է: Վարչապետի մամուլի խոսնակը հաստատել է լուրը: Արման Եղոյանը պարզաբանել է, որ Սոֆյա Նավասարդյանը վարչապետի եւ նրա տիկնոջ ոճաբանն է եւ շարունակելու է զբաղվել նույն գործով: Ըստ Եղոյանի՝ աշխարհում ընդունված պրակտիկա է, երբ երկրի ղեկավարը ոճաբան է ունենում:
Դոլարը շարունակում է թանկանալ, եվրոն եւ ռուբլին էժանացել են: Սեպտեմբերի 10-ին դոլարի փոխարժեքը կազմել է 484 դրամ, եվրոյինը՝ 561, ռուբլունը՝ 6 դրամ 92 լումա, ֆունտինը՝ 627 դրամ:
Սեպտեմբերի 11-ին հանրապետության հյուսիսային շրջաններում տեղումներ են սպասվում: Օդի ջերմաստիճանը 4-6 աստիճանով կբարձրանա: Երեւանում վաղը տեղումներ չեն սպասվում: Մայրաքաղաքում գիշերը կդիտվի +15+17, ցերեկը՝ +30+32 աստիճան տաքություն:
