Այցով Երեւանում է գտնվում Կանզասի Ազգային գվարդիայի պատվիրակությունը: Հայաստանի պաշտպանության նախարարության եւ Ազգային գվարդիայի միջեւ համագործակցության զարգացման 15-ամյակի հետ կապված՝ պատվիրակության անդամներին ընդունել է Հայաստանի պաշտպանության նախարար Դավիթ Տոնոյանը:
Հանդիպմանը մասնակցած Հայաստանում ԱՄՆ արտակարգ եւ լիազոր դեսպան Ռիչարդ Միլսը նշեց, որ համագործակցության ծրագիրը մշակվել է 90-ական թվականներին, երբ ԱՄՆ առջեւ ծառացած էր նախկին ԽՍՀՄ երկրների հետ հարաբերությունների զարգացման հարցը: Շեշտը դրված էր անվտանգության ոլորտի վրա: Որոշվել էր, որ դրան առավել համապատասխանում է Կանզասի Ազգային գվարդիան:
Համագործակցության ակտիվ փուլը մեկնարկել է 2003 թվականից: Խաղաղարարություն, տրանսպորտի հարցեր, ինժեներական ապահովում, բժշկություն՝ սա համագործակցության ուղղությունների ոչ ամբողջական թովարկումն է, արձանագրեց դեսպանը:
«Կանզասն ու Հայաստանը արդեն 15 տարի միասին են: Եվ ես համոզված եմ, որ համագործակցությունը կշարունակվի»,- շեշտեց դեսպանը:
