Հայաստանի ԶՈՒ Գլխավոր շտաբի պետ Արտակ Դավթյանը, փաստորեն, հերքեց ՀՔԾ պետ Սասուն Խաչատրյանի՝ 2008 թվականի մարտի 1-ի իրադարձություններին բանակի մասնակցությանն առնչվող հայտարարությունը:
Արտակ Դավթյանի խոսքով, մարտի 1-ին առաջնագիծը նոսրացված չի եղել. «Առաջնագիծը նոսրացված չի եղել, առաջնագծում մարտական աշխատանքը եղել է սովորական: Ես, որպես օպերատիվ վարչության պետ, պատասխանատու եմ եղել մարտական հերթապահության կազմակերպման հետ կապված, կարող եմ ասել՝ տվյալ դեպքերի ու առաջնագծի անմիջական գործողություններն իրար հետ չկապել», - ասաց նա՝ անդրադառնալով ՀՔԾ պետի այն հայտարարությանը, թե բանակը ոչ միայն մասնակցել է Մարտի 1-ի դեպքերին, այեւ կրակել է:
«10 տարվա վաղեմության դեպքերի վերաբերյալ տեղեկատվությունը, որն ինձ հասանելի է եղել, համապատասխան մարմինների հարցումով ես բոլոր հարցերին պատասխանել եմ: Ընթանում է քրեական գործ, որի արդյունքում ամեն բան պարզ կլինի: Ես չեմ կարող մեկնաբանել գործի նյութերին վերաբերող հարցերը»,- ասաց նա:
Նա հիշեցրեց, որ մարտի 5-ին Արցախում Ադրբեջանի կողմից եղել է դիվերսիոն փորձ, որը կանխվել է. «Ընդ որում հակառակորդը տվել է 10-12 զոհ, մենք ունեցել ենք 2 վիրավոր: Դրանից հետո, օրինակի համար, մենք 2014-2015 թվականներին ունեցել ենք 80-ից ավելի նման գործողություններ սահմանին»,- ասաց նա՝ հավելելով, որ այդ դեպքերը կապել Մարտի 1-ի հետ՝ մի քիչ վիճելի հարց է։
«10 առաջվա դեպքերի վերաբերյալ կարող եմ ասել, որ սահմանը չի տուժել, չի թուլացել, իսկ գործողությունը, որը եղել է, կապել-չկապելը պետք է հարցնել երեւի հակառակորդին, թե չէ ենթադրություններ կարելի է անել»,-ընդգծեց նա։
Արտակ Դավթյանը նաեւ հայտարարեց, որ մարտի 1-ին բանակը չի կրակել բնակարանների ուղղությամբ եւ, որ կրակելու հրաման չի եղել. «Բանակը չի կրակել, եթե կրակել են, կրակել են ինչ-որ անհատ զինծառայողներ, որոնք ունեն ազգանուններ, որոնց տակ կանգնած են անհատ մարդիկ: Ընդհանուր բանակը տասնյակ հազարավոր մարդիկ են, հիմա ասում ենք՝ տասնյակ հազարավոր մարդիկ կրակել են: Տասնյակ հազարավոր մարդիկ չեն կրակել, կրակել են կոնկրետ անհատներ»:
Պարզելու փորձին՝ արդյոք իրականությանը համապատասխանո՞ւմ է վարչապետ Նիկոլ Փաշինյանի հայտարարությունը, որ հերթափոխ չի կատարվել, Արտակ Դավթյանը հայտարարեց, որ դա ճիշտ է: Միաժամանակ, նա հավաստիացրեց, որ քննիչները հավանաբար ավելի շատ տեղեկություններ ունեն, քան ինքը 10 տարի անցնելուց հետո:
