Հարավային Կորեայի առեւտրի, արդյունաբերության եւ էներգետիկայի նախարարությունը հայտարարել է, որ դիտարկում է Apple ամերիկյան ապրանքանիշի ներմուծման արգելքը՝ կապված վերջինիս կողմից պատենտների խախտման հետ։ Այս մասին հայտնում է Business Korea պորտալը։
«Տվյալ պահին մենք քննում ենք այն հարցը, թե կարող էր արդյոք Apple-ը խախտել Գիտության եւ տեխնոլոգիաների կորեական ինստիտուտի (KAIST) դուստր-կազմակերպություն հանդիսացող KIP-ի պատենտը»,-հայտարարել են նախարարության ներկայացուցիչները։ Business Korea-ն պնդում է , որ արգելքի տակ կարող են հայտնվել iPhone 8, iPhone 8+, iPhone X սմարթֆոնները, իմչպես նաեւ iPad-ն ու iPad Pro-ն, որոնք ներմուծվում են Չինաստանից եւ Հոնգկոնգից։
Նշված աղբյուրի պնդմամբ՝ նախարարությունը մտադիր է պարզել, թե արդյոք KAIST-ի պատենտն իրական է։ Այս խնդրի լուծման համար Հարավային Կորեայի իշխանությունները մանրամասն կուսումնասիրեն Samsung Electronics-ի եւ ԱՄՆ-ում KAIST-ի միջեւ դատական վեճերը։ Ինչպես նշվում է, Samsung Electronics-ն արդեն ներկայացրել է պատենտի չեղարկման անհրաժեշտությունը հաստատող ապացույցներ։
1976թ. հիմնադրված Apple-ը թողարկում է iPhone սմարթֆոնները, iPad պլանշետները, MacBook նոթբուքերը, iMac սեղանի համակարգիչները, iPod երաժշտական ձայնարկիչները եւ բարձր տեղնոլոգիական այլ սարքեր։ Ընկերությունը խոշորագույններից է աշխարհում։