Վերջին տարիներին Ադրբեջանի եւ անձամբ Ալիեւի ապակառուցողական քաղաքականությունը, երբ Ադրբեջանի ղեկավարությունը հրաժարվում է ճանաչել Արցախի ժողովրդի ինքնորոշման իրավունքի ամբողջական իրացումը, սա է տորպեդահարում բանակցությունները, ոչ թե Հայաստանի ներկա եւ նախկին ղեկավարությունը։ Այս մասին NEWS.am-ի հետ զրույցում ասել է  ՀՀ ԱԺ փոխնախագահ, ՀՀԿ մամուլի խոսնակ Էդուարդ Շարմազանովը։

Նա անդրադարձել է Ադրբեջանի նախագահ Իլհամ Ալիեւի հայտարարությանը, իբր Նիկոլ Փաշինյանը հակասական հայտարորւթյուններով ամեն կերպ փորձում է ձախողել բանակցային գործընթացը, այդ դեպքում ողջ պատասխանատվությունը ընկնում է հայկական կողմի եւ անձամբ Փաշինյանի վրա։ 

ԱԺ փոխնախագահն ընդգծել է. ոչ թե հայկական կողմը կամ Նիկոլ Փաշինյանը, այլ բանակցությունների առաջընթաց չարձանագրելու միակ քաղաքական պատասխանատուն Ադրբեջանն է եւ Ադրբեջանի ապակառուցողական քաղաքականությունը։

Հիշեցնենք, որ այսօր՝ սեպտեմբերի 12–ին, Բաքվում, հանդիպելով ԵԱՀԿ գլխավոր քարտուղար Թոմաս Գրեմինգերին, Իլհամ Ալիեւը պնդել է, թե Նիկոլ Փաշինյանի հայտարարությունները՝ Ղարաբաղի ներկայացուցիչների հետ բանակցություններ վարելու մասին, անընդունելի են Ադրբեջանի համար: Նա պնդել է, որ, ընդհանուր առմամբ, ադրբեջանական կողմի մոտ տպավորություն է, ասես Փաշինյանը ամեն կերպ փորձում է ձախողել բանակցային գործընթացը։ Այդ դեպքում ողջ պատասխանատվությունը ընկնում է հայկական կողմի եւ անձամբ Փաշինյանի վրա։