ՀՀ կենտրոնական բանկի նախագահ Արթուր Ջավադյանն այսօր ընդունել է Չինաստանի բանկային համակարգի եւ ապահովագրության հանձնաժողովի նախագահ, Չինաստանի ժողովրդական բանկի նախագահի տեղակալ Գու Շուքինգի գլխավորած պատվիրակությանը:
ԿԲ-ից NEWS.am-ին հայտնում են, որ ԿԲ նախագահը ողջունելով հյուրերին՝ նշել է, որ գլոբալ ֆինանսական ճգնաժամը հրամայական է դարձրել ֆինանսական վերահսկողների միջեւ արդյունավետ երկխոսությունը եւ գործակցությունը: Նա գոհունակությամբ փաստել է երկու երկրների ֆինանսական համակարգի կարգավորողների միջեւ արդեն իսկ ձեւավորված արդյունավետ համագործակցությունը, ինչպես միջազգային եւ տարածաշրջանային կառույցների շրջանակում, այնպես էլ երկկողմ համագործակցության բնագավառում, ինչի վկայությունն է 2015 թ. ստորագրված ազգային արժույթներով արտարժութային ՍՎՈՓ գործարքների իրականացման վերաբերյալ կնքված համաձայնագիրը: Նա շեշտել է, որ կառույցների միջեւ ճիշտ համագործակցությունը եւ հաղորդակցումը նպաստում են ֆինանսական ոլորտում ռիսկերի կառավարման գործուն համակարգերի ձեւավորմանը ու հստակ վերահսկողական չափանիշների մշակմանը:
Հանդիպման արդյունքներով փոխըմբռնման հուշագիր է ստորագրվել ՀՀ կենտրոնական բանկի եւ Չինաստանի բանկային համակարգի եւ ապահովագրության կարգավորման հանձնաժողովի միջեւ, որը նշանավորում է երկու կառույցների միջեւ ֆորմալ վերահսկողական հարաբերությունների հաստատումը:
Նշենք, որ Չինաստանի բանկային համակարգի եւ ապահովագրության կարգավորման հանձնաժողովը Չինաստանի Պետական խորհրդի կողմից ստեղծված կառույց է, որը պատասխանատու է բանկային եւ ապահովագրական կազմակերպությունների գործունեության վերահսկողության համար:
Հանձնաժողովը ստեղծվել է 2018 թ-ին Չինաստանի բանկային համակարգի կարգավորման հանձնաժողովի եւ Չինաստանի ապահովագրության կարգավորման հանձնաժողովի միաձուլմամբ: