Հայ-ռուսական հարաբերությունները ոչ միայն չեն մահացել, այլեւ վերածնվել են, ինչի կապակցությամբ մեզ բոլորիս ուզում եմ շնորհավորել: Այս մասին այսօր՝ սեպտեմբերի 12-ին ՀՀ Ազգային ժողովում կառավարության հետ հարցուպատասխանի ժամանակ հայտարարեց վարչապետ Նիկոլ Փաշինյանը:
«Մոսկովյան իմ այցից առաջ Հանրապետական որոշ գործընկերներ գուժում էին հայ-ռուսական հարաբերությունների անժամանակ մահը. Ես ձեզ ուզում եմ հավաստիացնել, որ Հայ-ռուսական հարաբերությունները ոչ միայն չեն մահացել, այլեւ վերածնվել են, ինչի կապակցությամբ մեզ բոլորիս ուզում եմ շնորհավորել»,- հավելեց Փաշինյանը:
Նրա խոսքով՝ այս իրավիճակը պետք է շատ մանրամասն պարզաբանվի. վարչապետը պատրաստվում է դա անել հանրության առաջ, այս պատմության բոլոր մանրամասները բացելով:
«Եվ ուզում եմ հավաստիացնել, որ վարչապետի կարգավիճակում չեմ անի մի բան, որը ստիպված լինեմ թաքցնել հանրությունից: Այսինքն՝ հնարավոր է՝ ինչ-որ մի բան լինի ազգային անվտանգության, պետական շահերի խնդիր, այսօր բացահայտվի, ինչ-որ բան՝ 3 ամիս, 5 տարի հետո, բայց ես իմ գործունեության ամեն բացահայտված եւ չբացահայտված հատվածի համար գլխով պատասխան եմ տալիս ՀՀ ժողովրդի առաջ»,- հայտարարեց Նիկոլ Փաշինյանը: