Մյանմարի պետական խորհրդական եւ փաստացի առաջնորդ, Նոբելյան մրցանակի դափնեկիր Աուն Սան Սու Չժինը Հանոյում իր ելույթում պարզաբանել է, որ Մյանմարի 2 քաղաքացիների, «Ռեյթեր» բրիտանական լրատվական գործակալության լրագրողների կալանավորումն ու դատապարտումը կապված էին ոչ թե նրանց լրագրողոկան կարգավիճակի, այլ նրանց կողմից քրեական հանցագործություն կատարելու հետ, փոխանցում է «ՌԻԱ Նովոստի»-ն:
Սու Չժին ելույթ է ունեցել Վիետնամի մայրաքաղաք Հանոյում ընթացող Հարավարեւելյան Ասիայի պետությունների ասոցիացիայի Համաշխարհային տնտեսական համաժողովի լիագումար նիստում, որի հեռարձակումը կատարում է համաժողովի կայքը: Նիստին մասնակցել են Ասիա-Խաղաղօվկիանոսյան տարածաշրջանի եւ աշխարհի այլ տարածաշրջանների երկրների ներկայացուցիչներ:
«Նրանք բանտ չեն ուղարկվել այն պատճառով, որ լրագրողներ են: Նրանք բանտում են հայտնվել, քանի որ դատարանը որոշել է, որ խախտել են Պետական գաղտնիքների մասին օրենքը»,- հայտարարել է Մյանմարի պետական խորհրդականհը:
Հիշեցնենք, որ «Ռեյթերի» երկու լրագրողներ, Մյանմարի քաղաքացիներ Վա Լոունը եւ Չժո Սո Ուն կալանավորվել էին եւ 7 տարվա բանտարկության դատապարտվել այն պատճառով, որ Մյանմարի Ռաքհայն նահանգի իրավիճակի իրենց լրագրողական հետաքննության համար ապօրինի ճանապարհով ստացել էին Մյանմարի զինված ուժերի եւ ոստիկանության գաղտնի փաստաթղթեր: Հանոյում Սու Չժիի խոսքը լրագրողների գործի վերաբերյալ նրա առաջին մեկնաբանությունն է:
