Վարչապետ Նիկոլ Փաշինյանը եւ երկրորդ նախագահ Ռոբերտ Քոչարյանը պետք է հանդիպեն եւ կլոր սեղանի շուրջ բանակցեն: Այս մասին սեպտեմբերի 13-ին մամուլի ասուլիսի ժամանակ ասաց Ռեֆորմիստների կուսակցության առաջնորդ Վահան Բաբայանը:
Նրա խոսքով՝ բանակցությունները կդառնան ստեղծված իրավիճակից լավագույն ելքը, երբ երկրում տեղ է գտել սեւերի եւ սպիտակների, յուրայինների եւ օտարների բաժանում:
«Նույնիսկ պատերազմող երկրներն են բանակցությունների սեղանին նստում»,- նշեց նա՝ հավելելով, որ Ռեֆորմիստների կուսակցությունն իր կողմից պատրաստ է նպաստել հանդիպման կազմակերպմանը:
«Քաղաքում այսօրվա դրությամբ լարված իրավիճակ է ստեղծվել: Մենք տեսնում ենք, որ Փաշինյանի եւ Քոչարյանի կողմնակիցները հանդես են գալիս միմյանց քննադատությամբ: Մենք ցանկանում ենք, որ այլեւս տարաձայնություններ եւ սեւերի ու սպիտակների տարաբաժանում չլինի»,- նշեց Բաբայանը: