Վարչապետ Նիկոլ Փաշինյանը պատասխանել է Հայաստանի երկրորդ նախագահ Ռոբերտ Քոչարյանին:
Հիշեցնենք, որ նախօրեին նախկին նախագահը հայտարարել էր, որ ԱԱԾ եւ ՀՔԾ ղեկավարների միջեւ հեռախոսազրույցի սկանդալային ձայնագրությունը վկայում է, որ նպատակը նրան կալանավորելն էր:
Այսօր վարչապետը այցելել էր ՀՀ պաշտպանության նախարարություն եւ «Շանթ 2018» զորավարժությունների շրջանակներում կարճ ճեպազրույց անցկացրել, որից հետո լրագրողները փորձել էին հարց ուղղել Փաշինյանին: Չնայած պատասխանելու խնդրանքին, վարչապետը հեռացավ դահլիճից՝ ընթացքում լրագրողներին ասելով, որ Փարիզ է մեկնում, ուշանում է:
Չնայած դրան, լրագրողները, զինված տեսախցիկներով եւ շտատիվներով, վազեցին Փաշինյանի հետեւից: Բառացիորեն վազքի ընթացքում Փաշինյանը հայտարարեց, որ իր նպատակն է «փակել» բոլորին, ովքեր կատարել են Մարտի 1-ի հանցագործությունը:
Օլիգարխների թիկնապահների հետ կապված գործողությունների վերաբերյալ Փաշինյանն ասաց, որ գործողություններ կատարվել են, եւ դրա մասին արդեն հաղորդվել է: Մնացած միջոցառումների մասին կհաղորդվի ըստ անհրաժեշտության: