Ինձ իսկապես ապշեցնում է կառավարությունը ներկայացնող պատգամավորների ցանկությունը վիճարկելու Քննիչ հանձնաժողովի ստեղծման անհրաժեշտությունը։ Այս մասին այսօր՝ սեպտեմբերի 13-ին ԱԺ արտահերթ նիստին հայտարարեց ԱԺ ՀՀԿ պատգամավոր Սամվել Ֆարմանյանը։
Նրա համոզմամբ՝ քաղաքական տեսակետից այդ պատգամավորները պետք է ճիշտ հակառակն անեին․ «Սա առանձնահատուկ նշանակություն է ունենալու խորհրդարանական կառավարման ձևի փիլիսոփայության տեսանկյունից։ Քննիչ հանձնաժողովների ստեղծումը լավագույնս բխում է ձեր շահերից որպես քաղաքական իշխանություն, եթե, իհարկե, մտադիր չեք պետության կառավարման ձևն էլ փոխեք»,-շեշտեց Ֆարմանյանը։
Ավելի վաղ NEWS.am-ը հայտնել էր, որ օրեր առաջ համացանցում հրապարակվել էր ԱԱԾ տնօրեն Արթուր Վանեցյանի եւ ՀՔԾ պետ Սասուն Խաչատրյանի հեռախոսազրույցի ձայնագրությունը, որտեղ նրանք անդրադառնում են «Մարտի 1»-ի գործին, այդ գործով որպես մեղադրյալներ անցնող Ռոբերտ Քոչարյանի կալանավորման խնդրին, նաեւ ՀԱՊԿ գլխավոր քարտուղար Յուրի Խաչատուրովի եւ պաշտպանության նախկին նախարար Միքայել Հարությունյանի դեմ հարուցված քրեական գործերին: Ձայնագրության իրական լինելը ընդունել է ինչպես վարչապետ Նիկոլ Փաշինյանը, այնպես էլ զրույցի մասնակիցները: Զրույցի ընթացքում Վանեցյանը զրուցակցին ասում է Քոչարյանին բանտարկելու անհրաժեշտության մասին: Դրանից բացի, զրուցակիցները քննարկում են Խաչատուրովի կալանավորման հարցը: Վանեցյանը նշում է, որ այս դեպքում պետք է զգույշ լինել, քանի որ Մոսկվայի հետ հարաբերությունները փչացնելու հավանականություն կա: ՀՔԾ ղեկավարը հանգստացնում է՝ վստահեցնելով, որ Խաչատուրովի կալանավորման համար բոլոր հիմքերը կան:
ԱԱԾ տնօրենի եւ ՀՔԾ պետի հեռախոսազրույցի ձայնագրության սղագրությունը՝ ամբողջությամբ
