Թուրքիայի կենտրոնական բանկը որոշել է զգալիորեն խստացնել քաղաքականությունը գնային կայունության ապահովման համար եւ բարձրացրել է տոկոսադրույքը 625 բազիսային միավորով գնաճի ցատկի եւ լիրայի անկման ֆոնի վրա, հաղորդում է Reuters-ը:
«Անհրաժեշտության դեպքում, մենք կշարունակենք խստացնել դրամավարկային քաղաքականությունը», - ասել է կարգավորիչը` շաբաթական ռեպոյի տոկոսադրույքը 17,75 տոկոսից հասցնելով մինչեւ 24 տոկոս:
Լիրան 2018 թվականի սկզբից դոլարի նկատմամբ կորցրել է 40 տոկոս ` դրամավարկային քաղաքականության վրա Թուրքիայի նախագահ Թայիփ Էրդողանի ազդեցության մտավախության եւ Անկարայի եւ Վաշինգթոնի միջեւ դիվանագիտական առճակատման պատճառով:
Թուրքիայի Կենտրոնական բանկի որոշումից հետո լիրան կտրուկ աճել է եւ մոտ 3 տոկոսով աճել է դոլարի նկատմամբ՝ մինչեւ 6.15:
Էրդողանը նշել է, որ Թուրքիայի կենտրոնական բանկը անկախ է եւ ինքնուրույն որոշում է տոկոսադրույքները, սակայն նշել է, որ փոխառության բարձր արժեքի վերաբերյալ իր դիրքորոշումը մնում է անփոփոխ: