«Դեմոկրատական ուղի» կուսակցության կողմից առաջադրված քաղաքապետի թեկնածու Մանուել Գասպարյանի կարծիքով՝ անընդունելի է, որ մայրաքաղաքի կենտրոնը ծանրաբեռնված է բիզնես-կառույցներով։ Սեպտեմբերի 13-ին Մալաթիա-Սեբաստիայում նախընտրական երթի ժամանակ լրագրողների հետ զրույցում նա նշել է, որ Երեւանի կենտրոնը պետք է փակ լինի շինարարության համար, այստեղ պետք է կառուցվենմիայն մշակութային կենտրոններ եւ հասարակական նշանակության այլ օբյեկտներ։
Նրա խոսքերով՝ պատմամշակութային հուշարձանների արտաքին տեսքը կամ մայրաքաղաքի շենքերի ճարտարապետական ոճը փոխելու որոշումները պետք է կայացվեն հանրաքվեի միջոցով։
«Մեր կուսակցությունը Ավագանու ընտրություններում հաղթելու դեպքում մտադիր է քաղաքապետարանի գործունեության մեջ ներգրավել երեւանցիներին։ Մենք ամեն ամիս մեր աշխատանքների մասին պետք է հաշվետվություն ներկայացնենք քաղաքացիներին», -նշել է Մանուել Գասպարյանը։
Նրա կարծիքով՝ Երեւանն անհարմար է օպերատիվ ծառայությունների՝ հրշեջների, արտակարգ իրավիճակների նախարարության աշխատակիցների, շտապօգնության եւ անգամ ոստիկանության գործունեության համար։ «Առաջնահերթ խնդիրը, որ պետք է լուծվի, դա սահմանափակ հնարավորություններով մարդկանց տեղաշարժի ապահովումն է փողոցներում, ստորգետնյկա անցումներում եւ տրանսպորտում», -նշեց քաղաքապետի թեկնածուն։
Անհրաժեշտ է նաեւ անհապաղ լուծել քաղաքի կանաչապատման խնդիրը՝ ջրամատակարարման համակարգերը նորացնելու միջոցով, կարգավորել աղբահանությունը, քաղաքն ապահովել մաքրող տեխնիկայով։
«Ինչ վերաբերում է նախընտրական քարոզչությանը, չեմ կարծում, որ նախորդ իշխանությունների ներկայացուցիչները կփորձեն ընտրակաշառքներ բաժանել կամ այլ անօրինական գործողություններ կատարել։ Կարծում եմ, որ ոստիկանությունն արագ կարձագանքի դրան»,- ասաց Գասպարյանը