ԱՊՀ երկրների փոխվարչապետները, որոնք Մոսկվա են ժամանել Համագործակցության Տնտեսական խորհրդի նիստին մասնակցելու, Ժոողովրդական տնտեսության ձեռքբերումների ցուցահանդեսում (ԺՏՁՑ - ВДНХ) այցելել են «Հայաստան» տաղավարը: Այս մասին Facebook-ի իր էջում հայտնում է ՌԴ-ում Հայաստանի դեսպանատունը:
Ռուսաստանի առաջին փոխվարչապետ Անտոն Սիլուանովի գլխավորությամբ պատվիրակությունը դիտել է «Հայաստան» տաղավարի շենքը, ծանոթացել հայ արտադրողների արտադրանքին եւ ներկայացված ցուցադրանմուշներին, ինչպես նաեւ այցելել է հայկական տաղավարի ցուցահանդեսային համտեսման դահլիճներ:
Հյուրերին ներկայացվել է նաեւ տաղավարի զարգացման հայեցակարգը:
Տաղավար այցելության ժամանակ ԱՊՀ երկրների պատվիրակությանն ուղեկցել են Հայաստանի փոխվարչապետ Մհեր Գրիգորյանը, Ռուսաստանում Հայաստանի դեսպան Վարդան Տողանյանը եւ ՌԴ-ում ՀՀ առեւտրային ներկայացուցիչ Կարեն Ասոյանը: