Հույն միտրոպոլիտ Սերաֆիմը Կոստանդնուպոլսի պատրիարք Բարդուղիմեոսին կոչ է արել ապաշխարել, քանի որ նրա գործողությունները տանում են ուղղափառության պառակտման, հայտնում է «ՌԻԱ Նովոստի»-ն:
Միտրոպոլիտ Սերաֆիմի խոսքով, ում միտրոպոլիան դասվում է Հելլադական ուղղափառ եկեղեցուն, իրեն «վշտացրել» է այն տեղեկությունը, որ Ռուսաստանի պատրիարքը դադարեցրել է շփումները համատիեզերական պատրիարքարանի հետ:
«Այս տխուր եւ անմխիթարական արդյունքին է հանգեցրել Կոստանդնուպոլսի պատրիարքի համառությունը ուկրաինացի աղանդավորներին ինքնավար կարգավիճակ տրամադրելու հարցում»,- հայտարարել է միտրոպոլիտը:
Նա Կոստանդնուպոլսի պատրիարքի դիրքորոշումը պայմանավորել է անձնական դրդապատճառներով եւ շեշտել, որ նրա գործողությունները ուղղափառ աշխարհում «պառակտում եւ բաժանումներ» են սադրում: