ԱՄՆ նախագահ Դոնալդ Թրամփը վստահ է, որ Հյուսիսային Կորեայի առաջնորդ Կիմ Չեն Ընը հավատարիմ է Կորեական թերակղզու ապամիջուկայնացմանը եւ չի դավաճանի ԱՄՆ-ի հետ կնքած երկկողմ համաձայնագրին: Այս մասին նշված է ԱՄՆ նախագահի ուղերձում, որը երկուշաբթի Վիեննայում կայացած ԱԷՄԳ Գլխավոր համաժողովի 62-րդ նստաշրջանի պատվիրակների համար ընթերցել է ԱՄՆ էներգետիկայի նախարար Ռիք Փերրին, փոխանցում է ՏԱՍՍ-ը:
«Ես ուրախ եմ, որ նախագահ Կիմը հաստատեց իր հավատարմությունը Կորեական թերակղզու ապամիջուկայնացման գործին: Սա ստուգումներ է պահանջում, բայց ես վստահ եմ, որ նա մեր համաձայնագրին եւ մեր փոխանակած ձեռքսեղմմանը չի դավաճանի»,- նշված է Թրամփի ուղերձում:
Նրա խոսքով՝ «ԱՄՆ-ն բարձր է գնահատում ԱԷՄԳ-ի պատրաստակամությունը իր ավանդը բերել հանուն Կորեական թերակղզում եւ աշխարհում խաղաղության եւ անվտանգության»:
ԱՄՆ-ի եւ Հյուսիսային Կորեայի միջեւ պատմության մեջ առաջին բարձր մակարդակով հանդիպումը տեղի է ունեցել հունիսի 12-ին Սինգապուրում, որի արդյունքներով ԱՄՆ նախագահ Դոնալդ Թրամփը եւ Հյուսիսային Կորեայի Պետխորհրդի նախագահ Կիմ Չեն Ընը համատեղ հայտարարություն են ընդունել: Փհենյանը մասնավորապես հայտարարել է Կորեական թերակղզու ամբողջական ապամիջուկայնացմանը գնալու պատրաստակմության մասին, իսկ Միացյալ Նահանգները պարտավորվել է Հյուսիսային Կորեային անվտանգության երաշխիքներ տրամադրել: Այդուհանդերձ, կողմերի մտադրությունները սինգապուրյան ամփոփիչ հաղորդագրությայն մեջ չեն կոնկրետացվել:
