«Բարգավաճ Հայաստան» կուսակցության պատգամավորների մեծ մասը 2008 թվականի մարտին արտակարգ դրության մասին քվեարկությանը չի մասնակցել, իսկ մյուսները «դեմ» են քվեարկել:
Այս մասին սեպտեմբերի 17-ին Ազգային ժողովում ավանդական ճեպազրույցներում հայտարարեց «Ծառուկյան» դաշինք խորհրդարանական խմբակցության քարտուղար Վահե Էնֆիաջյանը՝ մեկնաբանելով «Ելք» դաշինքի խմբակցության ղեկավար Լենա Նազարյանի քննադատությունը «Բարգավաճ Հայաստան» կուսակցությունից Երեւանի քաղաքապետի թեկնածու Նաիրա Զոհրաբյանի մասին, մասնավորապես այն, որ վերջինս 2008 թվականի մարտին արտակարգ դրություն հայտարարելու օգտին քվեարկած պատգամավորներից մեկն էր:
Նրա խոսքով, այդ օրերին երկրում իրավիճակն այնպիսին էր, որ եթե արտակարգ իրավիճակ չհայտարարվեր, ապա զոհերի թիվը կավելանար: «Եվ այդ իրավիճակն, անհասկանալի ձեւով, դուրս գալով տրամաբանությունից, որոշ ժամանակ կշարունակվեր», - ասաց Էֆիաջյանը: