ԱՄՆ-ն հանդես է գալիս այն բանի օգտին, որպեսզի Իրանը միջուկային զենքին երբեք հասանելիություն չստանա: Այս մասին նշված է ԱՄՆ նախագահ Դոնալդ Թրամփի ուղերձում, որը երկուշաբթի Վիեննայում կայացած ԱԷՄԳ Գլխավոր համաժողովի 62-րդ նստաշրջանի պատվիրակների համար ընթերցել է ԱՄՆ էներգետիկայի նախարար Ռիք Փերրին, փոխանցում է ՏԱՍՍ-ը:
«Մենք պետք է ապահովենք Իրանի միջուկային ծրագրի բացառապես խաղաղ բնույթը եւ Թեհրանի առաջ ընդմիշտ փակենք միջուկային զենք ստանալուն տանող բոլոր ճանապարհները»,- նշված է Թրամփի ուղերձում:
Դրանից բացի, ԱՄՆ նախագահը հիշեցրել է Սիրիայի եւ այն մասին, որ Դամասկոսը «ԱԷՄԳ-ի հետ պետք է համագործակցի ամբողջական ծավալով՝ կատարելով գործակալության երաշխիքներով ստանձնած իր պարտավորությունները»:
Հիշեցնենք, որ Իրանի միջուկային ծրագրի համաձայնագիրը Թեհրանի եւ համաշխարհային 6 տերությունների միջեւ համաձայնեցվել է 2015 թվականին, իսկ 2016-ի հունվարին մտել իրականացման փուլ: Այն նախատեսում է Իրանի դեմ ՄԱԿ ԱԽ-ի, ԱՄՆ-ի եւ ԵՄ-ի սահմանած պատժամիջոցների հանում: Փոխարենը Իրանը պարտավորվել է սահմանափակել իր միջուկային ծրագիրը՝ այն դնելով միջազգային վերահսկողության ներքո: Սակայն ԱՄՆ նախագահ Դոնալդ Թրամփը 2018 թվականի մայիսի 8-ին հայտարարել էր համաձայնագրից Վաշինգթոնի դուրս գալու մասին:
