Մասիսի քաղաքապետ Դավիթ Համբարձումյանի խափանման միջոցը փոխվել է ստորագրություն չհեռանալու մասին։ Այս մասին NEWS.am-ի հետ զրույցում ասաց Մասիսի քաղաքապետի փաստաբան Տիգրան Աթանեսյանը։
«Առաջին ատյանի դատարանը բավարարաել է մեր միջնորդությունը եւ 5 միլիոն դրամ գրավի կիրառմամբ խափանման միջոց է ընտրել ստորագրությունը չհեռանալու մասին։ Գրավը մուծելուց հետո Դավիթ Համբարձումյանն ազատ կարձակվի»,–ասաց փաստաբանը։
Հիշեցնենք, որ Մասիսի Մասիսի քաղաքապետ Դավիթ Համբարձումյանը եւ նրա եղբայրը՝ Գոռ Համբարձումյանը կալանավորվել էին հուլիսի 7-ին՝ Էրեբունիում տեղի ունեցած խուլիգանության գործով:
Մասնավորապես՝ Մասիսի քաղաքապետ Դավիթ Համբարձումյանին մեղադրանք էր առաջադրվել ՀՀ քրեական օրենսգրքի 225-րդ հոդվածի 1-ին եւ 2-րդ մասերով եւ ՀՀ քրեական օրենսգրքի 258-րդ հոդվածի 4-րդ մասով, Գոռ Համբարձումյանին՝ ՀՀ քրեական օրենսգրքի 258-րդ հոդվածի 3-րդ մասի 1-ին կետով (2 դրվագ) եւ ՀՀ քրեական օրենսգրքի 258-րդ հոդվածի 4-րդ մասով:
Դավիթ Համբարձումյանը մեղադրվում է այս տարվա ապրիլի 22-ին Էրեբունի վարչական շրջանում մի խումբ անձանց հետ բողոքի ակցիա իրականացնող քաղաքացիների վրա հարձակվելու եւ քարերով, մահակներով, էլեկտրահարող սարքերով բռնություն գործադրելու մեջ:
Երկրորդ քրեական գործը, որտեղ ևս Մասիսի հանրապետական քաղաքապետը ներգրավվել է որպես մեղադրյալ, կրկին վերաբերում է նույն օրվան՝ ապրիլի 22-ին արդեն Երևանից դուրս տեղի ունեցած բողոքի ակցիային։ Ըստ Քննչական կոմիտեի, այդ օրը ժամը 16-17-ի սահմաններում Հայանիստ-Հովտաշատ խաչմերուկի բանուկ հատվածում տեղի է ունեցել միջադեպ, որին մասնակցել են Մասիսի քաղաքապետն ու նրա եղբայրը։