Երեւանի ավագանու ընտրությունները նորություն չեն «Դեմոկրատական ուղի» կուսակցության համար․ նրա անդամները երկար տարիների ընթացքում մասնակցել են Հայաստանի քաղաքական իրադարձություններին, այդ թվում՝ մարզերում։ Այս մասին Աջափնյակ թաղամասում նախընտրական երթի ընթացքում լրագրողների հետ զրույցում ասաց «Դեմոկրատական ուղի» կուսակցությունից Երեւանի քաղաքապետի թեկնածու Մանուել Գասպարյանը։

Թեկնածուի խոսքերով՝ կուսակցությունն իրեն նոր չի համարում, քանի որ նրա անդամները մասնակցել են տեղական ինքնակառավարման ընտրություններին՝ որպես վստահված անձինք եւ որպես այս կամ այն պաշտոնի թեկնածուներ։

«Նորն, ինչպես ասում են, լավ մոռացված հինն է։ Պարզապես մենք լրագրողների ուշադրության կենտրոնում հաճախ չենք հայտնվել, քանի որ խորհրդարանում ներկայացված չենք եղել, իսկ Երեւանի ավագանու կազմում ունեցել ենք ընդամենը մեկ մանդատ»,- նշեց Մանուել Գասպարյանը։

Ինչ վերաբերում է նախընտրական պայքարին, նա ասաց, որ զգացվում է ընտրություններին մասնակցելու ժողովրդի ցանկությունը։

«Հուսով եմ՝ սեպտեմբերի 23-ին քաղաքացիները ակտիվություն կցուցաբերեն։ Այդ օրը պատմական կլինի, քանի որ կդառնա թավշյա հեղափոխության նոր փուլը, եւ Հայաստանում թափանցիկ ու արդար ընտրությունների անցկացման հիմք կհանդիսանա»,- նշեց քաղաքապետի թեկնածուն։

Ինչ վերաբերում է Երեւանի հիմնահարցերին, նա ասաց, որ դրանք ընդհանուր են բոլոր շրջանների համար՝ կանաչապատում, շենքերի անսեյսմակայունություն, հաղորդակցություններ, համատիրություններ։

Հիշեցնենք, որ Երեւանի ավագանու ընտրությունները կանցկացվեն սեպտեմբերի 23-ին։