Դրանք ասեկոսեներ են, քանի դեռ չեն հաստատվել փաստերով։ Այսօր՝ սեպտեմբերի 18-ին հրավիրված մամուլի ասուլիսին այսպես արձագանքեց ՀՀ արդարադատության նախարար, Երեւանի ավագանու ընտրություններին «Լույս» դաշինքի քաղաքապետի թեկնածու Արտակ Զեյնալյանը՝ ԱԺ «Ելք» խմբակցության պատգամավորների հայտարարություններին ընտրակաշառքների բաժանման մասին։
«Այդ հայտարարությունները մնացել են չհաստատված։ Ոստիկանությունն աշխատում է այդ ուղղությամբ»,–նշեց նա։
Քաղաքապետի թեկնածուն ընդգծեց՝ աննախադեպ օրենսդրական փոփոխություններ են կատարվել, որոնք «աննախադեպ են ոչ միայն ՀՀ–ի մակարդակով, այլ նաեւ շատ երկրներում դա դեռեւս չկա, եւ ՀՀ–ն դարձել է օրինակ»:
«Ազատականացրել ենք պատասխանատվության ենթարկելու վերաբերյալ նախաձեռնությունները, որ եթե մարդիկ տեսնում են փաստեր վարչական պատասխանատվության համար, անմիջապես դիմեն վարչական դատարան»,–եզրափակեց նա։
Ավելի վաղ ԱԺ «Ելք» խմբակցության ղեկավար Լենա Նազարյանը հայտարարել էր, որ ահազանգ են ստացել ընտրակաշառքների բաժանման մասին։