Հայաստանի անկախության տոնի առթիվ կազմակերպվող տոնական միջոցառումների ֆինանսական մասը չի գերազանցի 100 մլն դրամի շեմը: Այս մասին, այսօր՝ սեպտեմբերի 18-ին Հանրապետության հրապարակի «գորգի» վրա կայացած մամուլի ասուլիսի ժամանակ նշեց Կառավարության աշխատակազմի ղեկավար Էդուարդ Աղաջանյանը:
Որպես համեմատություն, նա նշեց, որ Սարդարապատի 100-ամյակին նվիրված միջոցառման միայն բեմի տեղադրման եւ միջոցառման համար բյուջեի տրամադրվել էր 425 մլն դրամ:
Աղաջանյանի խոսքով, մարզերին տրամադրված է բյուջե, որպեսզի նրանք իրենց հերթին կազմակերպեն տոնական միջոցառումները. «Դիզայնի եւ բրենդինգի տեսանկյունից խորհրդանիշները ցրվում են բոլոր մարզեր, որ տրամադրությունները նույնը լինեն»:
Աղաջանյանը նաեւ նշեց, որ միջոցառումները չեն խանգարի Երեւանի ավագանու քարոզարշավի վերջին օրը: Նա ընդգծեց, որ «Սելֆիի ժամ» միջոցառման շրջանակներում իրենք պատրաստվում են հրավեր ուղարկել քաղաքապետի 12 թեկնածուներին. «Գուցե իրենց քարոզարշավը համատեղեն այս միջոցառման հետ»: