Միակ դրական բանը, որ կարող եմ արձանագրել այս ընտրություններում, այն է, որ չկա վախի մթնոլորտ: Այս մասին, այսօր՝ սեպտեմբերի 18-ին, Արաբկիրում քարոզարշավի ժամանակ լրագրողների հետ զրույցում նշել է «Երկիր ծիրանի» կուսակցության քաղաքապետի թեկնածու Զարուհի Փոստանջյանը:
«Մնացած առումներով, իհարկե, կան բացասական երեւույթներ, բայց շատ կարեւոր է, որ մարդիկ չեն վախենում, մոտենում, հարցնում եմ, լուծումներ են հարցնում, իրենք են լուծումներ առաջարկում»,-ասաց նա՝ հավելելով, որ քարոզարշավի այս կարճ ժամանակում կարողացել են երեւանցիներին փոխանցել իրենցծրագրային դրույթներն ու դրանք կյանքի կոչելու ուղիները:
Փոստանջյանը նշեց, որ Երեւանն ամբողջությամբ թաղված է խնդիրների մեջ. «Կան խնդիրներ, որոնք հնարավոր է լուծել կարճ ժամկետում, կան խնդիրներ երկարաժամկետ, եւ կան խնդիրներ, որոնք կարելի է լուծել անմիջապես: Օրինակ աղբահանության խնդիրը հնարավոր է լուծել անմիջապես, որ գարշահոտությունը չտարածվի ողջ քաղաքով մեկ: Իսկ Երեւանում մեկ ինտեգրված տրանսպորտի անցնելու հարցը կարելի է լուծել 1-2 ամսում՝ վերացնելով երթուղայինները»:
Անդրադառնալով քարոզարշավի ընթացքում տարբեր ուժերի կողմից փոխադարձ վիրավորանքներ հասցնելուն, Փոստանջյանն ասաց. «Կցանկանամ, որ ընտրություններին մասնակցող քաղաքական ուժերը փոխադարձ մեղադրանքներ չհնչեցնեն միմյանց հասցեին: Ամեն դեպքում, մի քանի ամիս առաջ էր, որ մենք բոլորս սիրո եւ համերաշխության կոչ էինք անում: Բոլոր ուժերը, որոնք այսօր կան այս ընտրապայքարում, ցանկանում են ծառայել երեւանցուն, Երեւանի խնդիրներն են ցանկանում լուծել: Իսկ դրա լուծումը կախված է մեզանից բոլորից: Կարիք չկա նման արտահայտությունների, կամ որեւիցե կերպ պետք չէ միմյանց մեղադրել: Կարծում եմ՝ դրա կարիքը չկա»:
«Երկիր Ծիրանիի» քաղաքապետի թեկնածուն նաեւ հասարակությանը սեւերի եւ սպիտակների բաժանելու կարիք չի տեսնում. «Ցանկացած արդյունավետ որոշում կախված է բոլորիս մասնակցությունից, նաեւ բազմազանությունից: Բոլոր այն երկրները, որոնք ներառող քաղաքականություն են իրականացնում, նրանք ունենում են հաջողություններ: Որքան շատ կարծիքներ, այնքան լավ որոշում: Հետեւաբար, պետք չէ բեւեռացնել հասարակությունը: Ցանկացած բեւեռացված հասարակություն չի կարող լինել առաջադիմական:
Հարցին՝ ինքը փաստորեն ո՛չ սեւ է, ո՛չ էլ սպիտակ, Զարուհի Փոստանջյանը ժպտալով պատասխանեց․ «Մենք ծով ծիրանի գույների մեջ ենք»:
Հիշեցնենք, որ Երեւանի ավագանու արտահերթ ընտրությունները տեղի են ունենալու սեպտեմբերի 23-ին: Ընտրություններին մասնակցում է 12 քաղաքական ուժ: