ՀՀ 3-րդ նախագահ Սերժ Սարգսյանի առանձնատան խնդիրը հետեւյալն է՝ մենք որպես առաջարկներ մի քանի տարբերակներ ենք ուղարկել 3-րդ նախագահի գրասենյակ, բայց բոլորը մերժվել են: Այս մասին այսօր՝ սեպտեմբերի 18-ին, «Ազատություն» ռադիոկայանի հետ զրույցում նշել է վարչապետի աշխատակազմի ղեկավար Էդուարդ Աղաջանյանը՝ հավելելով, որ Սերժ Սարգսյանի գրասենյակի կողմից մատնանշվող խնդիրները կապված են անվտանգության հետ:
«Ըստ այդմ, մենք նրանցից ենք հայցել, որպեսզի տարբերակներ ուղարկեն մեզ: Առայժմ մեզ որեւէ բան չի ուղարկվել, եւ հաշվի առնելով, թե ինչքան է ձգձգվում այս հարցը՝ հավանաբար, այն կունենա մոտավորապես հետեւյալ լուծումը. մենք նախորդ նախագահների տրված գույքի համեմատ կընտրենք ամենահարմար եւ ամենաադեկվատ գույքը: Դա կառաջարկենք, եւ դա կլինի մեր միակ եւ վերջնական առաջարկն անկախ նրանից՝ իրենք կառարկեն, թե ոչ»,- ասաց Աղաջանյանը՝ հավելելով, որ մոտ օրերս նման առաջարկով հանդես կգան:
Ավելի վաղ NEWS.am-ը հայտնել էր, որ վրչապետի պաշտոնից հրաժարական տալուց առաջ Սերժ Սարգսյանը հրաժարվել էր իրեն տրված կառավարական ամառանոցից:
Վարչապետ ընտրվելուց հետո Նիկոլ Փաշինյանը հայտարարել էր, որ կառավարության աշխատակազմի ղեկավարին հանձնարարել է զբաղվել 3-րդ նախագահին բնակարան տրամադրելու հարցով: Ասվել էր, որ խնդիրը կլուծվի մեկ ամսվա ընթացքում, սակայն մինչ օրս չի լուծվել: Այս պահին Սերժ Սարգսյանը դեռեւս բնակվում է կառավարական ամառանոցում:
