ՀՀԿ-ի Արաբկիր տարածքային կառույցի փոխնախագահ Երանոսյան Էդուարդը Հայկ Մարությանի նախընտրական շտաբում իր ամբողջ ներուժով սատարում է վերջինիս գործունեությանը: Այս մասին այսօր՝ սեպտեմբերի 18-ին լրագրողների հետ հանդիպման ժամանակ հայտարարեց ԲՀԿ խմբակցության պատգամավոր Վահե Էնֆիաջյանը։
«Մենք շատ չակերտներ չենք ուզում բացել, սակայն ո՞նց է ընկալվում այդ համադրությունը, երբ ՀՀԿ-ի Արաբկիր տարածքային կառույցի փոխնախագահը՝ Երանոսյան Էդուարդը, Հայկ Մարությանի նախընտրական շտաբում իր ամբողջ ներուժով սատարում է նրա գործունեությանը, երբ մեղադրանքները հնչում են մեր քաղաքական ուժի հասցեին»,- նշեց նա։
Պատգամավորի կարծիքով՝ ջրբաժան անցկացնելու, նախկին ՀՀԿ-ականներին զորացրվածներ անվանելու պարագայում նման գործելակերպը ճիշտ չէ։
Էնֆիաջյանը հիշեցրեց նաեւ «TV մոլ» պարբերականի հետ հարցազրույցում Մարությանի խոսքերը. «2008 թվականի հուլիսի 2-8-ին լույս տեսած «TV մոլ» պարբերականի համարում Հայկ Մարությանը հայտարարել է՝ հպարտ է, որ իր որդին՝ Արթուր Մարությանը, ծնվել է Սերժ Սարգսյանի երդմնակալության օրը»:
Նա, այնուհանդերձ, շեշտեց, որ չեն ցանկանում ներքաշվել այդպիսի խոսակցությունների մեջ, քանի որ ցանկանում են որակապես նոր քարոզարշավ ունենալ:
