Վարչապետ Նիկոլ Փաշինյանի հոգեվիճակն ինձ հասկանալի է։ Այսօր՝ սեպտեմբերի 18-ին լրագրողների հետ զրույցում նման կարծիք հայտնեց Երեւանի ավագանու ընտրություններին ԲՀԿ-ի նախընտրական ցուցակը գլխավորող Նաիրա Զոհրաբյանը՝ անդրադառնալով վարչապետի այն հայտարարությանը, թե «այս երեխաների ապագայի նկատմամբ ոտնձգություն կատարողներին ոչ միայն ասֆալտին կպառկեցնենք, այլև պատերով կտանք»:
«Վարչապետի հոգեվիճակը հասկանում եմ։ Նա շրջապատված է այնպիսի դիլետանտ կադրերով, որ ամբողջ ծանրաբեռնվածությունը վերցնում է իր վրա, եւ մարդու նյարդերը կարող են տեղի տալ, ես հասկանում եմ մարդկայնորեն այդ հոգեվիճակը։ Դա կարող է լինել այն մարդու հետ, որն աշխատում է նախարարների, կառավարության աշխատակիցների փոխարեն: Եթե քաղաքապետն էլ իրենց դաշինքից ընտրվի, նրա փոխարեն էլ կաշխատի Փաշինյանը»,- հայտարարեց Նաիրա Զոհրաբյանը։
