Ճարտարապետ Կարո Հալաբյանի հիշատակին նվիրված  հուշարձան կանգնեցնելու առաջարկը սթափ մտքից զուրկ չէ։ Այս մասին լրագրողներին հայտնել է Մոսկվայի գլխավոր ճարտարապետ Սերգեյ Կուզնեցովը, փոխանցում է «ՌԻԱ Նովոստի»–ն։

Ավելի վաղ Մշակութային եւ զանգվածային հաղորդակցության հարցերով Մոսկվայի քաղաքային դուման սատարել է Կարո Հալաբյանին նվիրված հուշարձանի կանգնեցումը Սոկոլ շրջանի «Մալիյ պեսչանիյ» նրբանցքի № 2 բնակելի տան մոտ։

«Ճարտարապետները մեծապես ազդում են ոչ միայն քաղաքի տեսքի, այլ նաեւ ընդհանրապես նրանց ճակատագրի վրա։ Ես սկզբունքորեն կողմ եմ, որ ճարտարապետներին նվիրված հուշարձաններ դրվեն, ընդ որում ոչ միայն մահացածների, այլ նաեւ ողջերի համար։ Ես  դեմ չեմ այդպիսի հուշարձանին»,–ասել է Կուզնեցովը։

Դրա հետ մեկտեղ նա նշել է, որ ճիշտ չէր լինի այդ հուշարձանին վերաբերվել սոսկ որպես ճարտարապետի հուշարձանի. «Հայ ներկայացուցիչներն ուղերձ են հղել։ Ես կդիտարկեի հուշարձանը որպես հայտնի հայի հուշարձան, որը նաեւ ճարտարապետ է»։

Նրա խոսքով՝ Հալաբյանը ակնհայտորեն ազդել է Մոսկվայի զարգացման վրա եւ որոշակի հետք է թողել։

Կարո Հալաբյանը ծնվել է Ադրբեջանում 1897 թվականին։ Հալաբյանը 1932–1950 թթ. եղել է Խորհրդային ճարտարապետների միության պատասխանատու քարտուղարը։ Հայրենական մեծ պատերազմից հետո ղեկավարել է Ստալինինգրադի վերականգնման աշխատանքները, մասնակցել է Կիեւի գլխավոր փողոցի՝ Կրեշատիկի վերականգնմանը։ 50-ականներին զբաղեցրել է ԽՍՀՄ ճարտարապետների ակադեմիայի փոխնախագահի պաշտոնը։