Հյուսիսային Կորեայի առաջնորդ Կիմ Չեն Ընը Հարավային Կորեայի նախագահ Մուն Չժե Ինին 2 տոննա արժեքավոր մացուտակե սունկ է նվիրել՝ ի հիշատակ Փհենյանում իրենց հանդիպման, Սեուլում կայացած ճեպազրույցում հայտնել է նախագահական աշխատակազմի ներկայացուցիչը, փոխանցում է «ՌԻԱ Նովոստի»-ն:
Նրա խոսքով՝ հաջորդ շաբաթ նշվող հիշատակության օրվա առիթով սնկերը կուղարկվեն բաժանված ընտանիքների անդամներին, որոնք դեռեւս ոչ մի անգամ չեն կարողացել հանդիպել Հյուսիսում գտնվող իրենց ազգականներին:
«Մենք ընտրել ենք առավել տարեց տարիքի մոտ 4 հազար մարդու, եւ նրանցից յուրաքանչյուրը կստանա 500 գրամ սունկ՝ աշնանային հիշատակության օրվա առթիվ»,- ասել է աշխատակազմի ներկայացուցիչը:
Նա հավելել է, որ Կիմ Չեն Ընի նվիրած 2 տոննա սունկը օդանավով Սեուլ է հասցվել լուսաբացին:
Մուն Չժե Ինը Հյուսիսային Կորեա այցն ավարտել է եւ ուղեւորվել Սեուլ: Հարավային Կորեայի նախագահը Փհենյանում է սեպտեմբերի 18-ից: Հանդիպումների արդյունքներով համատեղ հայտարարություն է ընդունվել Կորեական թերակղզին միջուկային զենքից եւ պատերազմի սպառնալիքից ազատելու ջանքերը շարունակելու մտադրությունների մասին: Բախումների կանխման եւ անվտանգության ապահովման կոնկրետ միջոցառումներն արտացոլվել են համաձայնագրում, որը առաջնորդների ներկայությամբ ստորագրել են երկու կորեական պետությունների պաշտպանության նախարարները:
Մուն Չժե Ինն առաջիկայում Կիմ Չեն Ընին Սեուլ է հրավիրել, եւ հրավերքն ընդունվել է:
