Կառավարությունն այսօր՝ սեպտեմբերի 20-ին իր հերթական նիստում որոշում է կայացրել ԱԳՆ-ին հատկացնել 109 միլիոն 296 հազար դրամ ՝ դեկտեմբերի 9-11-ին Հայաստանում կայանալիք «Ընդդեմ ցեղասպանության հանցագործության» Երրորդ գլոբալ ֆորումի նախապատրաստման եւ անցկացման հետ կապված միջոցառումների իրականացման նպատակով:
Նշենք, որ այդ գումարը պետք է ԱԳՆ-ին հատկացվի 9 ամսում, ՀՀ 2018-ի պետական բյուջեով նախատեսված կառավարության պահուստային ֆոնդի հաշվին:
Որոշման նախագիծը կառավարության նիստում ներկայացրեց ԱԳ նախարար Զոհրաբ Մնացականյանը:
Նշենք, որ ընթացիկ տարվա առաջին կիսամյակում արտաքին գործերի նախարարությունում ձեւավորված աշխատանքային խումբը մշակել է երրորդ Գլոբալ ֆորումի հայեցակարգը, կազմել է հրավիրյալների ցանկը եւ առաքել հրավերներ։
Ձեռք են բերվել մոտ հինգ տասնյակ առաջատար ցեղասպանագետների, ցեղասպանության թանգարանների ու հիշատակի համալիրների տնօրենների, մշակույթի ու արվեստի ներկայացուցիչների եւ իրավապաշտպանների՝ Ֆորումին մասնակցության նախնական համաձայնությունը։
Ֆորումին նախատեսվում է նաեւ ՄԱԿ-ի Գլխավոր քարտուղարի՝ Ցեղասպանության կանխարգելման հարցերով Հատուկ խորհրդականի մասնակցությունը:
