«Բարգավաճ Հայաստան» կուսակցությունը Երեւանի ավագանու ընտրություններին մասնակցող միակ քաղաքական ուժն է, որը հանդես է գալիս հստակ ներդրումային ծրագրերով։ Այս մասին այսօր՝ սեպտեմբերի 20-ին լրագրողների հետ հանդիպմանն ասաց  կուսակցության քաղաքապետի թեկնածու Նաիրա Զոհրաբյանը։ Միաժամանակ, նա նկատեց, որ ամեն ծրագիր առանձին վերցրած շուրջ մի քանի հարյուր միլիոն դոլար արժողություն ունի։

Իր հերթին «Ծառուկյան» խմբակցությունից ԱԺ փոխնախագահ Միքայել Մելքումյանը հայտարարեց, որ ԲՀԿ ղեկավար Գագիկ Ծառուկյանի նկատմամբ անձնական բարձր վստահությունն էլ հատուկ երաշխիք է արտասահմանից ներդրումներ բերելու առումով. «Սակայն դա տեղի կունենա այն պարագայում, եթե մենք քաղաքապետարանում իրական իշխանություն ունենանք։ Բացի այդ, այդ ծրագրերի իրականացմանը կարող են մասնակցել բոլոր այն քաղաքական ուժերը, որոնք կընդգրկվեն ավագանու կազմում»,–պարզաբանել է նա։

Ամենից առաջ, Մելքումյանի խոսքով, իրենց թիմը պատրաստվում է արագ ներգրավվել ներդրումներ թափոնների վերամշակման ոլորտում՝ ներդնելով համալիր ծրագիր։ Մասնավորապես, արդեն կա ընկերություն, որը պատրաստ է թափոնների վերամշակման ոլորտում ներդնել շուրջ 90 մլն դոլար։ Բացի աղբահավաքությունից եւ  թափոնների վերամշակումից, ԲՀԿ–ն պատրաստ է ներդրումներ ներգրավվել նաեւ մայրաքաղաքի տրանսպորտային համակարգում։