«Իմ քայլ»-ի կողմից առաջադրված Երեւանի քաղաքապետի թեկնածու Հայկ Մարությանի ողջ նախընտրական քարոզարշավն իր ուսերին տարավ գործող վարչապետ Նիկոլ Փաշինյանը։ Սեպտեմբերի 20-ին լրագրողների հետ հանդիպմանն այսպիսի կարծիք հայտնեց «Բարգավաճ Հայաստան» կուսակցության քաղաքապետի թեկնածու Նաիրա Զոհրաբյանը։
Նրա խոսքերով՝ Կառավարության ղեկավարը, առանց այն էլ պետության մասին հոգ տանելու ծանր բեռը ուսերին, գտնվելով հոգնած վիճակում, ստիպված էր ամեն երեկո Մարությանի փոխարեն տանել նախընտրական քարոզարշավը։
«Որովհետեւ եթե ընտրվի Հայկ Մարությանը, ըստ էության, ստացվում է, որ նորից Նիկոլ Փաշինյանն է ընտրվել «Երեւանի ամենայն քաղաքապետ», եւ մենք բոլորս կշնորհավորենք Նիկոլ Փաշինյանին՝ Երեւանի քաղաքապետ ընտրվելու կապակցությամբ»,- ավարտեց Զոհրաբյանը։
Հիշեցնենք, որ Երեւանի ավագանու ընտրությունները կկայանան սեպտեմբերի 23-ին։