Դաշնակցությունն անկախության տոնի առթիվ Նոր Նորքում խորովածի հյուրասիրություն էր կազմակերպել։ Այսօր՝ 2018 թ. սեպտեմբերի 21–ին ՀՅԴ ավագանու ցուցակը գլխավորող Միքայել Մանուկյանը լրագրողների հետ զրույցում հայտարարեց, որ հյուրասիրությունը կապ չունի քարոզարշավի հետ։
Նա նշեց, որ ՀՅԴ–ի Նոր–Նորք վարչական շրջանի կոմիտեն հյուրասիրությունը կազմակերպել է անկախության տոնին առթիվ։
Ամփոփելով քարոզարշավը, Մանուկյանը նշեց, որ այս ընթացքում լուրջ խախտումների ականատես չեն եղել։
«Քարոզարշավը մի քիչ քաղաքականացվեց, իմ ընկալմամբ՝ հատուկ խախտումներ չկային»,–նշեց նա։
Հարցին, թե ինչպե՞ս է գնահատում իր՝ քաղաքապետ ընտրվելու հնարավորությունը, Մանուկյանը պատասխանեց ՝ շատ բարձր։
«Իսկ ինչու՞ բարձր չպիտի գնահատենք, երկրում իրավիճակ է փոխվել, բարձրացել է մարդկանց մտածելակերպը, հոգեվիճակը, և ես հույս ունեմ, որ մեր քաղաքացիները քվերակելու են իրենց խղճի մտոք»,–ասաց նա։
Խոսելով հասարակությանը սևերի և սպիտակների բաժանելու՝ Հայկ Մարությանի հայտնի թեզից, Մանուկյանն ասաց. «Ես ճիշտ չեմ համարում սեւերի և սպիտակների բաժանումը։ Երբ խոսում ենք տրանսպորտի խնդրից, ի՞նչ է՝ պետք է տրանսպորտում նստարանները բաժանենք սեւերի և սպիտակների՞. սա անընդունելի է , սրա մասին բազմիցս մենք ասել ենք։ Երբ խոսքը գնում է մեր ժողովրդի մասին, ժողովուրդը չի կարող սև լինել»։
ՀՅԴ–ական քաղաքապետի թեկնածուն հույս հայտնեց, որ ընտրությունների օրը ընտրակաշառքի կամ վարչական լծակների գործադրման դեպքեր չեն լինի։ Մանուկյանը նշեց, որ այս ընթացքում ընտրակաշառք բաժանելու վերաբերյալ տեղեկություններ լսել է, սական չմասնավորեցրեց, թե խոսքը որ քաղաքական ուժի մասին է։