ԱՄՆ նախագահ Դոնալդ Թրամփի փաստաբան Ռուդոլֆ Ջուլիանին պնդում է, որ Թեհրանի դեմ Վաշինգթոնի սահմանած պատժամիջոցները աշխատում են եւ արդյունքում կհանգեցնեն հեղափոխության, որի արդյունքը կդառնա Իրանի ներկայիս իշխանությունների տապալումը: Նա այս մասին հայտարարել է Իրանա-ամերիկյան միությունների կազմակերպության համաժողովում ելույթ ունենալիս, հայտնում է Reuters գործակալությունը:
«Ես գիտեմ, թե մենք նրանց երբ կտապալենք»,- ասել է Ջուլիանին՝ խոսելով Իրանի իշխանությունների մասին: «Դա կարող է տեղի ունենալ մի քանի օրերի, ամիսների կամ տարիների ընթացքում,- պնդում է նա: - Բայց դա տեղի կունենա»:
«Իրանի ժողովուրդը, ակներեւորեն, չափից ավելի համբերեց»,- ասել է ԱՄՆ նախագահի փաստաբանը: Նրա խոսքով՝ Վաշինգթոնի սահմանած ամերիկյան պատժամիջոցները աշխատում են, ինչը բացասաբար է անդրադառնում Իրանում տնտեսական վիճակի վրա: «Նման պայմանները հաջողված հեղափոխության են հանգեցնում»,- հավելել է նա:
