Ազգային անվտանգության ծառայության տնօրեն Արթուր Վանեցյանն այսօր՝ սեպտեմբերի 23-ին, քվեարկեց թիվ 4/35 ընտրական տեղամասում:
Քվեարկությունից հետո լրագրողների հետ զրույցում Արթուր Վանեցյանը նշեց, որ առաջին անգամ լինելու է ժողովրդի կամքը եւ ժողովրդի տված քվեով է ընտրվելու քաղաքապետը:
«Եվ ոչ ոք չի կասկածելու այս ընտրությունների արդյունքի վրա»,- ասաց Արթուր Վանեցյանը:
Անդրադառնալով ԲՀԿ-ում նախօրեին տեղի ունեցած միջադեպին ու քաղաքապետի թեկնածու Նաիրա Զոհրաբյանի հայտարարությանը, թե ԱԱԾ-ն կարող է բացահայտել կեղծ ահազանգողներին, Արթուր Վանեցյանն արձագանքեց. «ԱԱԾ-ն չպետք է բարձրաձայնի իր կատարած աշխատանքների մասին, եթե ստանանք որեւէ ահազանգ, որը հիմք կտա կատարել համապատասխան միջոցառումներ եւ մարդկանց ենթարկել պատասխանատվության, մենք դա կանենք՝ առանց որեւէ մեկ րոպե հապաղելու, կապ չունի, թե որ քաղաքական ուժի կողմնակիցներն են: Ես առհասարակ կարծում եմ, որ ԱԱԾ-ն չպետք է խառնվի ընտրական գործընթացներին»:
Հիշեցնենք, որ Երեւանի ավագանու արտահերթ ընտրությունները մեկնարկել են այսօր՝ սեպտեմբերի 23-ին, առավոտյան ժամը 08.00-ին, եւ կտեւեն մինչեւ երեկոյան 20.00-ն: Երեւանի ավագանու ընտրություններին մասնակցում է 12 քաղաքական կուսակցություն ու դաշինք: