Երեկ՝ լռության օրը, տեղի ունեցավ ընտրական օրենսգրքի կոպտագույն խախտում, հրավիրվեց ասուլիս Դանիել Իոաննիսյանի կողմից, ով ի դեպ, հստակ շահերի բախում ունի, որովհետեւ կառավարությունում ընտրական օրենսգրքի աշխատանքային խմբի քարտուղարն է, եւ տեղի ունեցավ հակաքարոզչություն ԲՀԿ-ի հանդեպ: Այս մասին, այսօր՝ սեպտեմբերի 23-ին, Երեւանի ավագանու ընտրություններում քվեարկելուց առաջ լրագրողների հետ զրույցում նշեց Երեւանի քաղաքապետի ԲՀԿ-ի թեկնածու Նաիրա Զոհրաբյանը:
Նա տեղեկացրեց, որ այսօր իրենք դիմելու են վարչական դատարան Իոաննիսյանի գործողությունները վիճարկելու համար. «Քանի որ ապրում ենք նոր Հայաստանում, հետամուտ ենք լինելու, որ բոլորը օրենքի առջեւ լինեն պատասխանատու: Այն, ինչ ասում էր Իոաննիսյանը, որ իբր խախտվել է հարկային օրենսգրքի 30-րդ հոդվածի չգիտեմ ինչը, ֆլեշմոբի համար դուք պետք է տուրք վճարեիք, այսինքն անհասկանալի ձեւակերպումներ, լռության օրը հստակ հակաքարոզչություն է իրականացվել ԲՀԿ-ի հանդեպ: Մեր իրավաբաններն արդեն վարչական վարույթ են նախապատրաստում»,-ընդգծեց Զոհրաբյանը:
