Երեւանի քաղաքապետի ՀՅԴ-ական թեկնածու Միքայել Մանուկյանն այսօր՝ սեպտեմբերի 23-ին, քվեարկեց հանուն բարեկեցիկ ու կանաչապատ Երեւանի ու հանուն մայրաքաղաքի միասնականության եւ համերաշխության:
Քվեարկությունից հետո լրագրողների հետ զրույցում Միքայել Մանուկյանը քարոզարշավի ընթացքը բավարար գնահատեց. «Մի քիչ քաղաքականացվեց ընտրությունը եւ ավելի գնաց դեպի համապետական կամ վարչապետին սատարելու։ Վարչապետի մասնակցությունը մի քիչ իր ուղղությունից, իրական քաղաքապետական եւ ավագանու ընտրություններից շեղեց ընթացքը։ Վարչապետը խնդիր դրեց, որ դա իր վստահության քվեն է»:
Հարցին, թե բնական չէ՞, որ ընտրությունները քաղաքական են, ՀՅԴ թեկնածուն արձագանքեց. «Բնական է՝ քաղաքական են, բայց մեկ թեկնածուի կողմից, եթե խոսում ենք, որ վարչական լծակներ չպիտի օգտագործվեն, արդյոք վարչական լծակի օգտագործում չէ վարչապետի այդ մաշտաբի մասնակցությունը ընտրությանը»:
Հարցին՝ ձեր թիմի նկատմամբ որեւէ ճնշում, հակաքարոզչություն եղե՞լ է, Մ.Մանուկյանը պատասխանեց. «Ոչ, թիրախավորումներ եղել են ի սկզբանե դեպի մեզ, բայց ում կողմից, որ քաղաքական ուժի կողմից, հայտնի չէ»: Նա օրինակ բերեց, որ, երբ հայտնի է դարձել, որ ՀՅԴ թեկնածուն ինքն է, ինչ-որ պատմություններ են հիշել, որ իր հետ ընդհանրապես կապ չուներ, մի պահ ասացին, որ ինքն ընտրապայքարից դուրս է եկել։
Նա անդրադարձավ նաեւ նախօրեին ԲՀԿ Աջափնյակի շտաբում տեղի ունեցած խուզարկությանը՝ նշելով. «Ըստ հավաստի լուրերի ոստիկանությունը չի կարող այդպիսի գործողություններ կատարել: Մի քիչ ավելի պրոֆեսիոնալ պետք է լինի: վերջիվերջո, կուսակցության գրասենյակ է, 80 հոգով շրջապատել, հետո ասել՝ ոչինչ չգտանք»:
Հիշեցնենք, որ այսօր՝ սեպտեմբերի 23-ին, ընթանում են Երեւանի ավագանու արտահերթ ընտրությունները, որոնք կտեւեն մինչեւ երեկոյան 20.00-ն: Երեւանի ավագանու ընտրություններին մասնակցում է 12 քաղաքական կուսակցություն ու դաշինք: