Ցուցակագրումների մասին տարբեր տեղեկություններ մեզ հասել են կոնկրետ քաղաքացիներից, որոնք չեն ուզեցել իրենց անունները տալ: Այս մասին, այսօր՝ սեպտեմբերի 23-ին, թիվ 9/06 ընտրական տեղամասում լրագրողների հետ զրույցում նշեց «Ժառանգության» քաղաքապետի թեկնածու Րաֆֆի Հովհաննիսյանը:
Նա տեղեկացրեց, որ իրենք այդ տեղեկությունները փոխանցել են իրավապահ մարմիններին:
«Կարծեմ նույնը արել են նաեւ այլ կուսակցություններ: Ես շատ կուզեի, որ այս օրը սկսեի միմիայն դրական լիցքերով, որովհետեւ դա մեր տեսակն է, «Ժառանգության» տեսակն է:
Առավոտյան մտա այլ կուսակցությունների մի քանի շտաբներ բարի ընտրություններ մաղթելու համար, որտեղ ջերմ փոխադարձ բարեւներ էին, բայց այդտեղ կային նաեւ բնակիչների կոնկրետ ցուցակներ, բնակարան առ բնակարան, հեռախոսներ: Ես հույս ունեմ, որ ապագայում կամ բոլորը ունենան «դոստուպ» այդ ցուցակներին, որ օգտագործեն քաղաքացիների հետ շփվելու համար, կամ ոչ ոք չունենա:
Թող իրավապահ մարմինները որոշեն՝ դա խախտում է, թե ոչ: Կարող է դա օրենքների սահմաններում է: «Ժառանգությունը» երբեք դոստուպ չի ունեցել նման տեղեկատվության»,-ընդգծեց Րաֆֆի Հովհաննիսյանը:
Հիշեցնենք, որ Երեւանի ավագանու արտահերթ ընտրությունները մեկնարկել են այսօր՝ սեպտեմբերի 23-ին, առավոտյան ժամը 08.00-ին, եւ կտեւեն մինչեւ երեկոյան 20.00-ն: Երեւանի ավագանու ընտրություններին մասնակցում է 12 քաղաքական կուսակցություն ու դաշինք:
