Սեպտեմբերի 17-ին Սիրիայում ռուսական Իլ-20 օդանավի կործանման մեղքն ամբողջությամբ ընկած է Իսրայելի ՌՕՈՒ-ի եւ նրանց վրա, ովքեր համապատասխան որոշումն ընդունել են: Այս մասին կիրակի ճեպազրույցում հայտարարել է ՌԴ պաշտպանության նախարարության պաշտոնական ներկայացուցիչ Իգոր Կոնաշենկովը, փոխանցում է ՏԱՍՍ-ը:
Նրա խոսքով՝ «ներկայացված օբյեկտիվ տվյալները վկայում են 15 ռուսաստանցի զինվորականների զոհվելուն հանգեցրած կործանիչների իսրայելցի օդաչուների գործողությունների կա՛մ ոչ պրոֆեսիոնալիզմի, կա՛մ նվազագույնը հանցավոր անփութության մասին»:
«Հետեւաբար կարծում ենք, որ ռուսական Իլ-20 օդանավի ողբերգության մեղքը կրում են հենց Իսրայելի ռազմաօդային ուժերը եւ նրանք, ովքեր մասնակցել են նման կարգի գործունեության մասին որոշումը կայացնելուն»,- ասել է Կոնաշենկովը:
Նա շեշտել է, որ սեպտեմբերի 17-ի երեկոյան Իսրայելի ՌՕՈՒ կործանիչների գործողություններն «իրականացվել են Հմեյմիմ օդավակայանի՝ ոչ միայն ռազմական, այլեւ քաղաքացիական օդանավերի վայրեջքուղու շրջանում»: