Հեղափոխություն դեռ տեղի չի ունեցել, բայց ամենակարեւորը՝ գործող իշխանությունը ստանձնել է պարտավորություն՝ անցկացնել արդար, թափանցիկ ընտրություններ, հետեւաբար, դա այս իշխանությունների քննությունն է: Այս մասին, այսօր՝ սեպտեմբերի 23-ին, Երեւանի ավագանու ընտրություններում քվեարկությունից հետո լրագրողների հետ զրույցում նշեց «Երկիր ծիրանիի» քաղաքապետի թեկնածու Զարուհի Փոստանջյանը:
«Մենք սպասում ենք, թե ինչպես է հանձնելու քննությունը այս իշխանությունը: Իր ձեռքում են լծակները, որոնցով պետք է կանխվեն ընտրակեղծիքները: Սա նաեւ բոլորիս քննությունն է, մենք իրավունք չունենք կրկնել այն սխալները, որոնք եղել են քառորդ դար»,-ասաց նա:
Փոստանջյանն ասաց, որ ընտրակեղծիքների մասին ահազանգեր լսել է, բայց փաստակված դրանք ներկայացնելը շատ դժվար է, եւ դա օպերատիվ հետախուզական գործողություններ իրականացնող մարմինների գործն է, ոչ թե քաղաքացիների:
«Ցանկալի է, որ բոլոր քաղաքական ուժերը ունենան ժողովրդի քվեն, վստահությունը, բոլոր ցուցակների մեջ կան մարդիկ, որոնք կարող ուժ են, սրտացավ են Երեւանի համար: Ես կցանկանայի, որ բոլորս ներկայացված լինեինք եւ մեր ներկայությունը լիներ բազմազանության միջոցով եւ բոլորիս ուժերի կոնսոլիդացման միջոցով:
Պետք է ունենալ շատ մրցունակ կառավարություն, որը կարող է կազմված լինել ազգի լավագույն ներկայացուցիչներից: Սա է պահանջում մեր այսօրվա իրականությունը, նաեւ այն մարտահրավերները, որոնց առջեւ կանգնած ենք:
Մենք չգիտենք, թե ինչպիսին կլինի ապագա քաղաքապետարանը, բայց միանշանակ է, որ անդառնալի են այն գործընթացները, որոնք նախկինում եղել են: Այսինքն այլեւս 170 մլն դոլարի բյուջեն թույլ չենք տալու ապօրինի գործարքների միջոցով լվացքատնով անցկացնել: Չենք թողելու, որ ապօրինի յուրացնեն, այդ գումարները ծառայելու են ի շահ երեւանցիների»,-հայտարարեց Զարուհի Փոստանջյանը: