ԱՄՆ-ն ցանկանում է Իրանում անվտանգության սպառնալիք ստեղծել տարածաշրջանում «փոքր վարձկան պետությունների» միջոցով, սակայն Իսլամական Հանրապետությունը պատրաստ է դիմակայել նրանց: Այս մասին հայտարարել է Իրանի նախագահ Հասան Ռուհանին` նախքան Նյու Յորք մեկնելը ՄԱԿ-ի Գլխավոր Ասամբլեային մասնակցելու համար, գրում է PressTV-ն:
Նրա խոսքով, ամերիկացիները ցանկանում են քաոս եւ անկարգություններ ստեղծել` Իրան վերադառնալու համար պայմաններ ստեղծելու նպատակով, ինչպես որ անցյալում էր, բայց դա անհնար է: «Դրանք անհասանելի երազանքներ են, եւ Ամերիկան երբեք չի հասնի այդ նպատակներից որեւէ մեկին», - ավելացրել է Ռոհանին:
«Մեր ժողովուրդը դիմակայելու է, եւ կառավարությունը պատրաստ է այդ առճակատմանը», - ասել է նա: «Ամերիկացիները ափսոսալու են իրենց արածի համար, որովհետեւ նրանք շատ սխալ ընտրություն են կատարել», - ավելացրել է նա:
Ռոհանին նշել է, որ ԱՄՆ-ն տարածաշրջանային երկրներին հրահրում է Իրանի դեմ, նկատի ունենալով Ախվազ քաղաքում ահաբեկչական հարձակումը: «Մեզ համար հստակ է, թե ով է դա արել», - ասել է նա: «Տարածաշրջանի այս բոլոր փոքրիկ վարձկան երկրների հովանավորը Ամերիկան է», - ավելացրել է նա:
Սեպտեմբերի 22-ին Իրանի Ախվազ քաղաքում ռազմական շքերթի ընթացքում ահաբեկչական հարձակում էր տեղի ունեցել: Մարդկանց վրա կրակ են բացել ամբիոնի հետեւում գտնվող անհայտ զինված անձինք: Սպանվել է 25 մարդ, մոտ 60 մարդ վիրավորվել է: Այսօր՝ սեպտեմբերի 24-ին, Իրանում ահաբեկչության արդյունքում զոհվածների համար սգո օր է հայտարարվել:
