Երեկվա ընտրությունները անորոշ ժամանակով հետաձգեցին արտահերթ խորհրդարանական ընտրությունները, այդ խնդիրը դարձավ էլ ավելի անլուծելի: Այս մասին Facebook-ի իր էջում գրել է Եվրոպական ուսումնասիրությունների կենտրոնի ղեկավար Արթուր Ղազինյանը։
Նա, մասնավորապես, նշել է.
«Ցանկանում եմ շնորհավորել իմ լավ բարեկամ Հայկ Մարությանին նախօրեին տարած համոզիչ հաղթանակի կապակցությամբ, մաղթել արգասաբեր եւ արդյունավետ աշխատանք հանուն քաղաքամայր Երեւանի եւ երեւանցիների։
Սակայն սեպտեմբերի 23–ի ընտրություններն ի ցույց դրեցին ՀՀ քաղաքական համակարգի անառողջ բնույթն ու ընտրողների էմոցիոնալ մոտեցումը առավելապես տեղական նշանակության ընտրական գործընթացների նկատմամբ։
82% քվեն նորմալ չէ առողջ եւ մրցակցային ընտրությունների համար, քանի որ պատմության մեջ այդքան ձայներ ստացած քաղաքական ուժերը հետագայում լուրջ խնդիրներ են առաջացրել, առաջինը՝ պետության, ապա՝ իրենց համար։
Այս վտանգավոր բարձր տոկոսը վկայում է իրական մրցակցության բացակայության մասին, քանի որ չկա այդպիսի քաղաքական օրակարգ եւ ծրագիր, որը, բնական մրցակցային պայմաններում, ստանա ընտրողների 82%–ը։
Սա, կարծում եմ, լուրջ առիթ է մտահոգվելու Փաշինյանի համար, որն, իմ խորին համոզմամբ, իրականում ցանկանում է Հայաստանը տեսնել ազատ եւ ժողովրդավարական։
Երկրորդ դիտարկումը, որ կցանկանայի անել, կապված է երեկվա ընտրությունների եւ արտահերթ խորհրդարանական ընտրությունների միջեւ զուգահեռների հետ, քանզի իմ գնահատմամբ, երեկվա ընտրություններն անորոշ ժամանակով հետաձգեցին արտահերթ խորհրդարանական ընտրությունները երկու հիմնական պատճառով։
Առաջինը ՀՀ պետական ինստիտուտների, քաղաքական ուժերի եւ հասարակության անպատրաստ լինելն է այդպիսի կարեւոր եւ պատասխանատու գործընթացին, ինչի վառ վկայությունն են երեկվա ընտրությունների արդյունքները։
Եթե արտահերթ խորհրդարանական ընտրությունները կայանան այս տարվա վերջում, ապա խորհրդարանում Փաշինյանի կողմից պաշտպանվող ուժը կամ ուժերի դաշինքը կհավաքի նույն քանակի ձայներ, ինչը լրջագույն ժողովրդավարական խնդիրներ կհարուցի Հայաստանի ներքին եւ արտաքին վարկանիշի համար։
Երկրորդ պատճառը գործող խորհրդարանի արձակման խնդիրն է, որը, երեկվա ընտրությունների արդյունքներով, դարձավ է՛լ ավելի անլուծելի։
Ո՛չ Հանրապետական կուսակցությունը, ո՛չ «Ծառուկյան դաշինքը» եւ ո՛չ էլ Դաշնակցությունը այլեւս հեշտությամբ չեն զիջի ԱԺ-ում ունեցած ազդեցությունը՝ հասկանալով, որ հաջորդ խորհրդարանում չեն կարողանալու ապահովել գոնե նվազագույն ներկայություն։
Իսկ Սահմանադրությունը, որքան էլ այն մոռացված եւ անտեսված լինի, ամեն դեպքում մնում է Հայաստանի Հանրապետության հիմնադիր փաստաթուղթը, որտեղ ԱԺ-ի արձակման համար պահանջվում է Ազգային ժողովի համաձայնությունը։
Եթե Փաշինյանը որոշի կապիտալիզացնել երեկվա ընտրությունների արդյունքները ԱԺ արտահերթ ընտրությունների միջոցով, ապա գործընթացը կմտնի արդեն սահմանադրական ճգնաժամի փուլ՝ դրանից բխող բոլոր վտանգավոր հետեւանքներով։
Հայաստանը գտնվում է քաղաքական խորագույն ճգնաժամի մեջ, որի հաղթահարման միակ ճանապարհը արտահերթ խորհրդարանական ընտրություններն են, բայց եթե դա տեղի չունենա ՀՀ Սահմանադրությամբ սահմանված կարգով, ապա հետեւանքները կլինեն անկանխատեսելի եւ ծանր»։
Ավելի վաղ NEWS.am-ը հայտնել էր, որ սեպտեմբերի 23-ին կայացած Երեւանի ավագանու ընտրություններում նախնական տվյալներով «Իմ քայլը» դաշինքը ստացել է 81,06 տոկոս, ԲՀԿ-ն՝ 6,95 տոկոս, «Լույս» դաշինքը՝ 4,99 տոկոս:
