Հայաստանին Եվրամիությունից ներդրումներ ներգրավելու համար կայունություն է անհրաժեշտ: Սեպտեմբերի 25-ին Երեւանում կայացած Հայաստան-Եվրամիություն առեւտրի հարցերով համագործակցության կոմիտեի առաջին նիստի շրջանակում լրագրողների հետ զրույցում այս մասին ասաց Եվրահանձնաժողովի Առեւտրի դեպարտամենտի գլխավոր տնօրեն Պետրոս Սուրմելիսը:
Նա նշեց, որ Եվրամիության պատվիրակության Հայաստան կատարած այցի հիմնական նպատակը բարեփոխումներ իրականացնելն է, որոնք նպաստում են բարենպաստ ներդրումային եւ գործարար միջավայրի ստեղծմանը:
«Բարեփոխումները, մասնավորապես, կանդրադառնան կարգավորման ոլորտին: Ներկայումս ստեղծվում են նոր կանոնակարգեր, որոնք ուղղված են բիզնեսի համար հավասար մրցակցային պայմանների ապահովմանը: Սա է հիմնական նպատակը` նորարարության ոլորտում ձեռնարկությունների՝ ինչպես պետական, կամ մասնակի պետական, այնպես էլ մասնավորնորի, մասնավորապես, սթարթափերի համար հավասար պայմանների ապահովում», - ասաց եվրոպացի պաշտոնյան:
Անդրադառնալով առեւտրային հարաբերությունների զարգացմանը, նա նշեց, որ ԵՄ երկրների եւ Հայաստանի միջեւ առեւտրաշրջանառության ցուցանիշները լավատեսություն են ներշնչում. 2017 թվականի տվյալների համաձայն, ապրանքաշրջանառությունը գերազանցել է մեկ միլիարդը:
«Սակայն որոշակի ապրանքային խմբերի առումով որոշ բացեր կան, մասնավորապես, Հայաստանից արտահանվող գյուղմթերքի ծավալների պակասը: Բայց այս բացը աստիճանաբար լցվում է», - ընդգծեց Սուրմելիսը: