Թուրքիայի նախագահ Ռեջեփ Թայիփ Էրդողանի՝ Գերմանիա կատարելիք այցի նախօրեին Եվրոպական հանձնաժողովը դեմ է արտահայտվել Անկարային տնտեսական օգնության ցուցաբերմանը։ ԵՄ–ն Թուրքիային տնտեսական օգնություն տրամադրելու անհրաժեշտություն չի տեսնում, հայտարարել է Եվրոպական հանձնաժողովի ընդլայնման եւ եվրոպական հարեւանության քաղաքականության հարցերով հանձնակատար Յոհաննես Հանը Die Welt թերթի հետ հարցազրույցում։
Հանի խոսքով՝ ներկա տնտեսական խնդիրները Թուրքիայում ունեն ներքաղաքական պատճառներ։
«ԵՄ–ի կամ առանձին երկրների կողմից օգնության փաթեթների կամ վարկերի տրամադրումը Անկարային չի կարող կարգավորել իրավիճակը»,–շեշտել է նա, փոխանցում է DW–ն։
«ԵՄ–ն շահագրգռված է կայուն եւ բարգավաճող Թուրքիայի հարցում. «Լուրջ դրամավարկային քաղաքականությունը, անկախ էմիսիոն բանկը եւ ժողովրդավարության սկզբունքներին անփոփոխ հետեւելը կօգնեն կրկին վերականգնել այդ երկրի տնտեսությունը»,–նշել է Հանը՝ հավելելով, որ Թուրքիայի տնտեսության ու քաղաքականության նկատմամբ վստահության վերադարձի դեպքում արեւմտյան ընկերությունները կուժեղացնեն ներդրումներն այս երկրում։