Չպետք է բացառել Ռուսաստանի եւ Իսրայելի միջեւ հարաբերությունների վատթարացումը: Այս մասին NEWS.am-ի թղթակցի հետ զրույցում ասաց Քաղաքական եւ ռազմական վերլուծության ռուսական ինստիտուտի փոխտնօրեն Ալեքսանդր Խրամչիխինը:
Փորձագետը քիչ հավանական է համարում, որ կողմերից որեւէ մեկը պատրաստ լինի զիջումների գնալ եւ մեղմացնել իր դիրքորոշումը: «Եթե Իսրայելը կրկին մտադրություն ունենա հարվածել Սիրիայի տարածքին, ապա վատ բան կարող է տեղի ունենալ, բայց չեմ կարող ասել ինչ», - բացատրեց Խրամչիխինը:
Միեւնույն ժամանակ, ռուսական ռազմական փորձագետը շեշտեց, որ, բացի C-300 զենիթահրթիռային համալիրների մատակարարումից, Ռուսաստանը Սիրիայի զինված ուժերում հակաօդային պաշտպանության համակարգերի ինտեգրացիա կանցկացնի եւ կներդնի սեփական ռադիոլոկացիայի համակարգերը: Խրամչիխինը չի բացառում միասնական հակաօդային պաշտպանության համակարգ ստեղծելու հնարավորությունը, ինչպես դա եղավ Հայաստանի դեպքում:
Խրամչիխինը չփոքրացրեց կամ չբացառեց ռուսական կողմի մեղավորությունը ողբերգական դեպքի կապակցությամբ, նշելով, այն պետք է վաղուց մտահոգվեր Սիրիայում հակաօդային պաշտպանության համակարգերի ինտեգրացմամբ նման դեպքերից խուսափելու համար:
«Իսրայելական կործանիչները փաստացի մեր Իլ-20 հետախույզ ինքնաթիռը սիրակաան ՀՕՊ-ի հարվածի տակ դրեցին: Դրանում կա նաեւ մեր մեղավորությունը: Եթե մենք սիրիացիների մոտ եղած ՀՕՊ-ի ինտեգրացիա անցկացնեինք, ապա օրինակ իսրայելական ինքնաթիռների ոչնչացման ժամանակ կատիվանար «սեփական-օտար» ճանաչման համակարգը, ինչն իր հերթին թույլ կտար խուսափել այդ ողբերգությունից: Բայց մերոնք, չգիտես ինչու, չարեցին», - ասաց Ալեքսանդր Խրամչիխինը:
