«Յունիբանկ» ԲԲԸ-ն եւ FMO-ն կիրականացնեն «Կանայք բիզնեսում» նոր վարկավորման ծրագիրը, որի շրջանակներում կին ձեռներեցներին կտրամադրվի 10 մլն ԱՄՆ դոլարի վարկավորում: Համագործակցության համաձայնագրի ստորագրման արարողությունը երկու կազմակերպությունների միջեւ տեղի կունենա 2018թ.-ի հոկտեմբերին Նիդերլանդներում:
Բիզնեսում կին ձեռներեցների ներգրավման միտումը Հայաստանում գնալով աճում է: Ըստ վիճակագրական տվյալների, վարկավորման անհրաժեշտ պայմաններին համապատասխանող փոքր ձեռնարկությունների 22%-ը եւ միջին ձեռնարկությունների 15%-ը ղեկավարում են կանայք: Այդ միտումը առկա է բոլոր ուղղություններում, հատկապես` գյուղատնտեսության, առեւտրի եւ ծառայությունների ոլորտում:
«Մենք ուրախ ենք FMO-ի հետ նման արդյունավետ համագործակցության համար: Այն հնարավորություն կտա աջակցել ՓՄՁ-ների զարգացմանը եւ նպաստել Հայաստանում նոր աշխատատեղերի ստեղծմանը: Շուկայում կան լայն հնարավորություններ եւ աճի մեծ ներուժ, որը կնպաստի ՓՄՁ-ների հետագա զարգացմանն ու տեղական շուկայում մրցունակության բարձրացմանը: Մենք կարեւորում ենք կին ձեռներեցների գործունեությունը եւ ուրախ ենք, որ FMO-ի կողմից տրամադրվող վարկային միջոցները հնարավորություն կտան Յունիբանկին նրանց առաջարկելու հենց իրենց պահանջմունքներին համապատասխան վարկատեսակներ: Մեր շնորհակալություն եմ հայտնում նաեւ մեր գործընկեր Capital Locus ընկերությանը` միջոցների ներգրավման գործընթացը սահուն կերպով կազմակերպելու համար»,- նշեց Յունիբանկի Վարչության նախագահ Մեսրոպ Հակոբյանը:
«FMO-ի ռազմավարության կայուն զարգացման գերակայություններից մեկը անհավասարության կրճատումն է: Մեր նոր գործընկեր Յունիբանկի կողմից Կանայք բիզնեսում վարկային ծրագրի իրականացումը կբարձրացնի կին ձեռներեցների զարգացման կարեւորությունը Հայաստանի տնտեսության համար: Այն կնապստի նաեւ աշխատատեղերի ստեղծմանը եւ կխթանի կանանց ներգրավածությունը բիզնեսում: Մենք ակնկալում ենք երկարատեւ եւ արդյունավետ համագործակցություն Յունիբանկի հետ», - հավելեց FMO- ի Ներդրումների գծով տնօրեն Լինդա Բրոխհուիզենը:
