ՌԴ նախագահ Վլադիմիր Պուտինի այցը Հայաստան քննարկվել է, սակայն մինչեւ այս տարվա ավարտ քիչ հավանական է, պետք է աշխատել 2019 թվականի համար, հայտնել է ՌԴ նախագահի օգնական Յուրի Ուշակովը, հայտնում է «ՌԻԱ Նովոստի»–ն։
«Իսկապես, քննարկվել է մեր նախագահի այցի կազմակերպման հնարավորությունը Հայաստան, սակայն հստակ ժամկետներ չի քննարկվել»,–ասել է Ուշակովը ճեպազրույցի ժամանակ։
«Նկատի է առնվել, որ նախագահները կհանդիպեն ոչ միայն Դուշանբեում (ԱՊՀ գագաթնաժողովին), այլ նաեւ Աստանայում ՀԱՊԿ նստաշրջանին։ Դա մեկ, եւ դեկտեմբերին Մոսկվայում նախատեսվում է Եվրասիական տնտեսական միության գագաթնաժողով, որը նույնպես հնարավորություն է տալիս առաջնորդներին մտքեր փոխանակել, առնվազն կարճ ժամանակով։ Այցի հարցը կամ ինչ–որ ժամկետների մասին դեռեւս չի քննարկվել...Կարծում եմ, որ, հնարավոր է, այցի մասով տեղին կլինի սպասել հաջորդ տարում»,–հավելել է նա։
Նա հիշեցրել է, որ ՌԴ առաջնորդի ու ՀՀ վարչապետի վերջին հանդիպումը բոլորովին վերջերս է կայացել. «Այս տարի նրանք արդեն 3 անգամ հանդիպել են, բավականին հիմնավոր քննարկումներ են ունեցել»,–շեշտեց Ուշակովը։
Ավելի վաղ ՀՀ ԱԳՆ մամուլի քարտուղար Տիգրան Բալայանը հայտարարել էր, որ ՌԴ նախագահ Վլադիմիր Պուտինը Հայաստան կժամանի պաշտոնական այցով։ Հաստատելով սպասվող այցը՝ ԱԳՆ մամուլի քարտուղարն, այնուամենայնիվ, որեւէ հստակություն չմտցրեց։ Այցը նախատեսվում է մոտ ժամանակներս, իսկ թե երբ, Բալայանը չնշեց։