Երեւանի մետրոյի մեկ կայարանի կառուցման համար անհրաժեշտ է 100-150 մլն դոլար: Այս մասին NEWS.am-ի թղթակցի հետ զրույցում ասաց «Սպառողների խորհրդատվության կենտրոն» ՀԿ-ի նախագահ Կարեն Չիլինգարյանը:
Նա նշեց, որ միակ թաղամասը, որտեղ ներկայումս հնարավոր է նման նախագիծ սկսել, Աջափնյակն է: «Դեռ խորհրդային տարիներին «Բարեկամություն» կայարանից մինչեւ Մաթեմատիկական մեքենաների գիտահետազոտական ինստիտուտ (Մերգելյան) ստորգետնյա թունել էր փորվել, որտեղ արդեն սկսվում է կիրճը», - հիշեցրեց Չիլինգարյանը: Այս տեղում Աջափնյակի թաղամաս տանող կամուրջ պետք է կառուցվի:
Ընդհանուր առմամբ Աջափնյակի նոր մետրոյի կայարանի կառուցումը կատարվել է ընդամենը 10 տոկոսով: Տեղադրվել էր միայն կայարանի թեք մուտքը, բայց այն փակված է:
«Անհրաժեշտ է ավելի քան հարյուր մետր հորատել, ինչպես նաեւ պարզել թունելի վիճակը, քանի որ 27 տարիների ընթացքում այս թունելում շինարարական աշխատանք չի եղել, եւ կարող են փլուզումներ լինել», - ասաց ՀԿ-ի ղեկավարը:
Նրա խոսքով, այս պահին Հայաստանում մետրոյի կառուցման մասնագետներ գրեթե չկան:
«Պետք է ներգրավել օտարերկրյա մասնագետներին եւ տեղական կադրերին վերապատրաստել», - ասաց Չիլինգարյանը:
Ընդհանուր առմամբ, փորձագետը կարծում է, որ անհրաժեշտ է ներդնել շուրջ 100-150 միլիոն դոլար թունելների, կամուրջի եւ նոր կայարանի կառուցման համար, եւ եթե հնարավոր է մեծ ներդրումներ ներգրավել, հնարավոր է միաժամանակ կամուրջներ եւ թունելներ կառուցել, ինչը 3 տարի կտեւի:
