Հեղափոխությունից հետո բացվել է Հայաստան–ԵՄ համագործակցության նոր էջ, այդ թվում՝ արդարադատության ոլորտի ազատ եւ արդար դառնալու հարցում։ Սեպտեմբերի 27–ին այս մասին ասաց Հայաստանում ԵՄ պատվիրակության ղեկավար Պյոտր Սվիտալսկին՝ ելույթ ունենալով արդարադատության ոլորտում բարեփոխումների շրջանակում Հայաստան–ԵՄ ռազմավարական երկխոսությանը նվիրված աշխատանքային խորհրդակցության ժամանակ։
Պյոտր Սվիտալսկին նշեց այս ուղղությամբ հանրապետությանը պարբերաբար սատարելու ԵՄ պատրաստակամությունը։ Դեսպանը դրական գնահատեց Հայաստանի վարչապետ Նիկոլ Փաշինյանի հայտարարությունն այն մասին, որ այլեւս հարցերը չեն լուծվելու դատավորներին զանգելով։ Դեսպանի խոսքով՝ դատավորների ներքին ազատությունը եւ դատարանների անկախությունը առանցքային նշանակություն ունեն։
Սվիտալսկին նշեց նաեւ կոռուպցիայի դեմ պայքարի կարեւոր դերը։ «Դատական համակարգը պետք է ամբողջությամբ ազատվի կոռուպցիայի ցանկացած դրսեւորումից»,– շեշտեց նա։ Սվիտալսկին անդրադարձավ նաեւ էլեկտրոնային դատավարության ներդրման հարցին՝ նշելով դրա արդյունավետությունը։
Ինչպես նշեց արդարադատության նախարար Արտակ Զեյնալյանը, հեղափոխությունից հետո աշխատանքի առանջնահերթություններից մեկն է արդարադատության ոլորտի հանդեպ բնակչության վստահության վերականգնումը։ Նախարարը նշեց այս ոլորտում բարեփոխումների իրականացման եւ կոռուպցիայի դեմ պայքարի գործում ԵՄ անգնահատելի ավանդը։