ՀՀ երկրորդ նախագահ Ռոբերտ Քոչարյանի ունեցվածքի վերաբերյալ ուսումնասիրություն է կատարվում։ Այս մասին այսօր՝ սեպտեմբերի 27-ին, լրագրողների հետ զրույցում ասաց ԱԱԾ տնօրեն Արթուր Վանեցյանը։
«Ուսումնասիրության արդյունքները առաջիկայում կհրապարակենք»,- ասաց նա։
Ավելի վաղ ապօրինի գաղտնալսման հարցով հրավիրված մամուլի ասուլիսին ԱԱԾ տնօրենը, անդրադառնալով ՀՀ երկրորդ նախագահ Ռոբերտ Քոչարյանի ունեցվածքին, նշել է. «Ռոբերտ Քոչարյանը հեռուստատեսությամբ հանդես է գալիս եւ ասում է՝ «մենք ոչ մի բան չունենք»։ Փաստերով կխոսենք եւ կհրապարակեմ ով ինչ ունի եւ ոնց է ձեռք բերել։ Ոնց է ձեռք բերել «Կոնգրես» հյուրանոցը 6 միլիոն դոլար կաշառք վերցնելու արդյունքում եւ մնացած այլ, այլ ունեցվածքները»։
Ավելի վաղ NEWS.am-ը Դատական տեղեկատվական համակարգից տեղեկացել էր, որ Ռոբերտ Քոչարյանի որդին հայց էր ներկայացրել Վանեցյանի դեմ՝ պահանջելով զրպարտության դիմաց փոխհատուցում եւ հրապարակային հերքում, սակայն չհաջողվեց պարզել՝ թե ինչ հերքման մասին է խոսքը:
Հատկանշական է, որ նախօրեին ԱԱԾ տնօրենը որոշ խմբագրումներ է արել ավելի վաղ Ռոբերտ Քոչարյանի վերաբերյալ արված հայտարարություններում՝ դրանք ներկայացրելով որպես արագ խոսելու հետեւանք:
«Ես միայն մի ճշտում եմ ուզում անել. մամուլի ասուլիսի ժամանակ ես հայտարարեցի վեց միլիոն կաշառքի մասին: Դա մի քիչ արագ խոսելու արդյունք էր: Ոչ թե կաշառք, այլ հանցավոր ճանապարհով ձեռք բերված գումարների արդյունքում գնում է կատարված»,- հայտարարել է Վանեցյանը: Նշենք, որ խոսքը Ռոբերտ Քոչարյանի կողմից, ըստ ԱԱԾ ղեկավարի հայտարարության, 6 միլիոն կաշառքով հյուրանոց ձեռք բերելու մասին է, որի մասին Վանեցյանն ասել էր սկանդալային հեռախոսազրույցի հրապարակումից հետո ՀՔԾ պետի հետ հրավիրած ասուլիսում:
