ՀՀ տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը լիահույս է, որ Հյուսիս–հարավ ճանապարհն ի վերջո իր ավարտին կհասցվի։
Այսօր՝ սեպտեմբերի 27–ին, Կառավարության նիստից հետո լրագրողների հետ զրույցում տրանսպորտի նախարարը նշեց, որ ավելին, առաջիկայում սկսելու են Հյուսիս–հարավի ամենադժվար հատվածի շինարարությունը։
«Կարծում եմ՝ Հյուսիս–հարավը կտեսնենք, որովհետեւ այն, ինչու մեղադրում են, մենք էլ ենք համաձայն, թե ինչի են սկսել Արտաշատ–Աշտարակ հատվածից, մենք հիմա նախատեսում ենք ամենադժվար հատվածում աշխատանքն առաջ գցել, խոսքը Սիսիան–Քաջարան հատվածի մասին է եւ պրոյեկտը մասնատել եւ խիստ հատվածը սկսենք»,– ասաց Աշոտ Հակոբյանը։
Հարցին, թե ինչու է Արտաշատի հատվածում վերանորոգման աշխատանքներ կատարվում, եթե շահագործման է հանձնվել ընդամենն ամիսներ առաջ, Աշոտ Հակոբյանը պատասխանեց. «Ճանապարհը դեռ ընդունված չի, ճանապարհի ավարտական ակտ չկա, պարտավոր են բոլոր թերությունները վերացնել, ճաքերը վերացնել, մենք էլ փորձաժամկետ ենք սահմանել, այդ ընթացքում կհասկանանք՝ եթե թերությունները վերացված են, կընդունենք ճանապարհը»։
